Кезінде ашылып, қайта жабылып қалған «Окси Текстайл» жіп иіру фабрикасы жұмысын қайта жандандырды. Қазір тоқыма кластерінің 30 пайызы іске кіріскен. Өйткені мекеме 4 миллиард теңгеге жуық қарызын қайтаруы шарт. Алайда несие сомасын қайтару бойынша әзірге нақты шешім жоқ.
[youtube]http://www.youtube.com/watch?v=OTo_prRo9ZM[/youtube]
Ниетбек Қанаев, «Окси Текстайл» ЖШС бас директоры: «Қазақстанның даму институттарымен тамыз айына дейін келіссөз жүргізіп жатырмыз. Екі жаққа да тиімді, ортақ шешімге келеміз деп ойлаймын.»
2010 жылы «Окси Текстайлдың» алаулатып-жалаулатып ашылған салтанатты рәсіміне Елбасының өзі де қатысып еді. Жоғары сапалы мақта өнімдерін шығаратын кешенді автоматтандырылған жіп иіру фабрикасы қазақстандық шикізатты өңдеуге бағытталған болатын. Тіпті, жоғары сапалы өнімімізбен Еуропаны да таң қалдырмақ болғанбыз. Алайда, 5,5 миллиард теңгенің жобасын шикізаттың жоғы мен қаржы айналымының аздығы есігін қара құлып күзетуге мәжбүр еткен-ді. Мәселені шешкен билік қазір бұл қиындық артта қалды деп сендіреді.
Сапарбек Тұяқбаев, облыс әкімінің орынбасары: «Шикізат бойынша қазір толық қамтамасыз етілген. Жергілікті кәсіпкерлердің шикізатымен 6 мың тоннаға келісім-шарт жасалған. Бұл дегені – шикізат бір жылдан астам уақытқа толығымен жетеді.»
Нөмірі 8-ден бастап 60-қа дейінгі жіп иіретін фабрика екі аптаның ішінде толық қуатта жұмыс істеуге кіріседі. Қазір Қытай тапсырыс берген жіпті осындағы 75 адам жасап жүр. Кәсіпорын толық күшіне енсе, мұнда 300-дей жаңа жұмыс орны ашылып, жылына 6200 тонна жіп иірілетін болады. Айтпақшы, таяудағы көк ақша бағасының көкке ұшуы да нақ осы фабриканың оң жамбасынан келді дейді мамандар.
