You are here
Оңтүстікте үш күндік қазақ-түрік инвестициялық форумы басталды Жаңалықтар 

Оңтүстікте үш күндік қазақ-түрік инвестициялық форумы басталды

Шымкентте алғаш рет Қазақстан-Түркия бірлескен инвестициялық форумы басталды. Өңірімізге шетелдік инвестицияларды көптеп тартуға бағытталған 3 күндік шараға 200-ге жуық түркиялық делегат пен қазақстандық 300 кәсіпкер қатысуда.

Делегацияны құрамында көш бастаған Түрік кеңесі бас хатшысының орынбасары Омер Коджаман мен Түркия ұлттық экономика министрінің кеңесшісі Тарык Сонмез, Анкара қаласы мэрінің кеңесшілері Рамазан Кабасакал, Мехмед Али Арслан және Сакария провинциясының сауда-өнеркәсіп палатасының басқарма төрағасы Маһмуд Косемусул және денсаулық сақтау, экономика министрлігінің өкілдері мен кәсіпкерлер сынды жауапты тұлғалар бар.

Оңтүстікте үш күндік қазақ-түрік инвестициялық форумы басталды

Сонымен бірге форум жұмысына ОҚО әкімі Жансейіт Түймебаев, Қазақстанның инвестициялар және даму министрлігінің инвестициялар комитетінің төрағасы Сапарбек Тұяқбаев және салаға қатысты жауапты жетекшілер мен кәсіпкерлер қатысуда.

Форумда түркиялық инвесторларға өңір экономикасы мен инвестициялық ахуалы және инвестицияларға қатысты Қазақстанның мемлекеттік бағдарламалары таныстырылды. Сондай ақ, мұнда екі жақты іскерлік топтар арасындағы сауда-экономикалық қарым-қатынастарды жандандырып, нығайтатын іскерлік бағдарлама ретінде бетпе-бет кездесулерге басымдық берілетін болады.

 

Оңтүстік өңіріне арнайы келген түрік кәсіпкерлеріне алғысын білдірген өңір басшысы Ж.Түймебаев бұл форумның Елбасының күні кешегі «Қазақстанның үшінші жаңғыруы: жаһандық бәсекеге қабілеттілік» атты жолдауында айтылған міндеттерді орындаудағы негізгі алғышарттардың бірі екенін атап өтіп, жиынның маңыздылығына тоқталды. Сонымен қатар әкім Түркия Қазақстанның саяси және экономикалық тұрғыдағы ең жақын және сенімді серіктесіне айналғанын айтып, бүгінгі екі жақты кездесудің жемісті боларына сенім білдірді.

Ақпан айының 1-3-жұлдызы аралығында өтетін қазақ-түрік инвестициялық форумы аясында «ОҚО-ның инвестициялық әлеуеті» тақырыбындағы конференциядан бөлек облыстың инвестициялық жобаларының, тауар өндірушілерінің, даму институттарының және туристік жобаларының көрмесі, сонымен қатар, ОҚО-ның негізгі туристік бағыттары бойынша ақпараттық турлар өткізу жоспарлануда.

Нақтырақ айтқанда 2 ақпан күні «Көрме» орталығында 80-нен астам отандық тауар өндіруші мен туризм саласының, ОҚО даму институттары мен өңірдегі инвестициялық жобалардың бірлескен көрмесі түрік кәсіпкерлерінің назарына ұсынылып, туристік саладағы екіжақты кездесулер өтеді. Ал 3 ақпанда түрік делегаттары «Шымкент-Отырар-Түркістан» туристік бағыты бойынша жолға шығып, тарихи жерлерге саяхаттайды деп жоспарлануда.

Related posts

Пікір қалдыру

Алғашқы болып пікір жазыңыз!

Маған хабар беру:
777
wpDiscuz