«Біз естімеген бір ән, бір күй». Шымкентте осындай тақырыпта ерекше байқау басталды. Шараны қолға алған мәдениет басқармасы мамандарының айтуынша, өнер бәсекесіне іріктеу жыл бойы жүргізіліпті. Өткен жылы бастау алған шараға биыл осылайша 81 өнерпаз жолдама алған. Айта кетейік, байқаудың ерекшелігі – ел арасында сағыныш қана емес, ұмытылар шегіне жеткен ән-күй, терме-толғауларды жаңғырту.
Нұрсұлтан Пірмән көпшілік алдында сағынышқа айналған күйді шертіп отыр. Білім ошағы – «Алтын ұямен» қоштасу сезімдері баяндалатын туындыны өнер иесі ауыл-аймақты аралап жүріп, 2 ай бойы меңгерген.
Нұрсұлтан Пірмән, облыстық саз колледжінің студенті: «Үлкен сахна болған соң, әрине, қобалжыдым. Қазіргі ойнап шыққан күйім Батырхан Ыстамбетовтың «Алтын ұя» деген күйі. Бұрын орындалған екен, қазір елге сағыныш болған. Қолымнан келгенше сол күйді көптің алдында тартып бердім. Жеңістен үміттіміз, бір Алланың қолында ғой. Өзге де қатысушылар осал емес, байқап отырмын. Оларға сәттілік, өзіме жеңіс тілеймін.»
Ширек ғасырдың естелігі күмбірлеген күйдің бойынан табылды. Сағым сырды ұқтырды да. Ал осы байқауға 29 күйші, 24 термеші, 6 жыршы және 22 дәстүрлі әнді дәріптейтін күміс көмей өнерпаздар жолдама алған. Шарт бойынша үміткерлердің әрқайсысы 2 бірдей туындыны орындауға мүмкіндік алды. Айтпақшы, ұйымдастырушалар бәйгеге түсер шығармаларды жыл бойы жинақтапты.
Күлия Айдарбекова, облыстық мәдениет басқармасының басшысы: «Бірнеше топ ауыл-аудандарға шығып, аралап, аға буынның көмегіне жүгінді. Ауылдың ақсақалдары мен әжелерінен әрбір өлең жолдарын жазып алып, қайырмасын өзге елдімекендегі қариялардан сұрап жүріп, еңбектерді түгендеп жүрміз. Нәтижесінде 900-ден астам өте сирек кездескен я болмаса бұрын-соңды орындалмаған халық, дәстүрлі әндеріміз, күйлер, жыр-дастандар табылып жатыр. Бүгінгі таңда 85 халық әні нотаға түсірілді, 100-ге жуық біз естімеген авторлардың әндері нотаға түсірілуде.»
Облыстық мәдениет басқармасы мамандарының айтуынша, «Біз естімеген бір ән, бір күй» жобасы аясында халық әндері, терме-толғаулар, күйлер мен сазгерлердің шығармалары жинақталып, арнайы жинағы жарық көреді деп жоспарланып отыр. Айта кетейік, баяқау жеңімпаздары 17-мамыр күні кешке белгілі болады.
[youtube]https://www.youtube.com/watch?v=9Xf10pfHlkg[/youtube]
