Жаппай декларациялау: Қазақстандықтар үшін бірыңғай қағидалар бекітілді

122
inform.kz

Жеке тұлғаның активтері мен міндеттемелері туралы декларацияның нысаны және оны жасау қағидалары бекітілді. Бұл туралы ҚазАқпарат Қазақстан Республикасы нормативтік құқықтық актілерінің ақпараттық-құқықтық жүйесіне сілтеме жасап хабарлайды. Атап айтқанда, ҚР Қаржы министрінің 2018 жылғы 21 маусымдағы № 617 бұйрығы жарияланып, құжат ҚР Әділет министрлігінде 2018 жылғы 9 шілдеде № 17163 болып тіркелді.

«Осы бұйрық 2020 жылғы 1 қаңтардан бастап қолданысқа енгізіледі және ресми жариялануға тиіс», — деп атап өтілген Қазақстан Республикасы нормативтік құқықтық актілерінің ақпараттық-құқықтық жүйесінде.  «Осы Жеке тұлғаның активтері мен міндеттемелері туралы декларацияны (250.00-нысан) жасау қағидалары «Салық және бюджетке төленетін басқа да міндетті төлемдер туралы» 2017 жылғы 25 желтоқсандағы ҚР Кодексіне (Салық кодексі) сәйкес әзірленді және жеке тұлғалардың активтері мен міндеттемелері туралы декларациясының жасалу тәртібін айқындайды», — делінген құжатта.

Бұдан бұрын хабарланғандай, 2020 жылдың 1 қаңтарынан бастап, қазақстандықтар жеке мүлкі мен кірісі туралы жылына бір рет есеп беруге міндеттеледі.  «Декларацияда үйде сақтаулы тұрған қолма-қол қаражатты да көрсету керек. Егер қолма-қол ақша көлемі ең төменгі жалақы көлемінің 500 есесінен асып кетсе (Еңбекақының ең төменгі мөлшері — 28 284 теңге),  банкте есепшот ашып, қаражатты сонда сақтауыңыз керек. Сосын банкте осындай қаражатыңыз бар екенін көрсетесіз», — деп түсіндірді ҚР Қаржы министрлігі Мемлекеттік кірістер комитеті төрағасының орынбасары Мәди Тәкиев.

Кәмелеттік жасқа толмаған, бірақ тіркеуде тұрған мүлкі бар тұлғалар үшін декларацияны ата-анасы немесе қамқоршысы жеке сәйкестік нөмір арқылы толтырады. Алдын ала болжам бойынша, 2020 жылы Қазақстанда шамамен 12 млн 900 мың адам декларация толтыратын болады. Оның ішінде 7,4 млн адам — қала тұрғындары және 5,5 адам — ауыл тұрғындары болады деп күтілуде.