V Дүниежүзілік көшпенділер ойындарында алыптар сайысы бойынша Азамат Мақұлбеков жеңімпаз атанды. Көрермен көз тіккен тартысты бәсекеде арыстық палуан қарсылас шақ келтірмей топ жарып, алтын медальды жеңіп алды.
Алыптар бәсекесінде 16 елден келген 16 палуан білектің күшін көрсетіп сынға түсті. Абсолют салмақ дәрежесінде сынға түскен спортшылар бес сайыстан өзара мықтыны анықтады.
Атап айтқанда:
100 келі тасты көтеріп, оны 10 метрге жылжыту;
100 келілік қаппен отырып тұру;
10 келілік найзаны оң немесе сол қолмен 10 метр қашықтықта тұрған нысанаға лақтыру;
130 келілік бөренені иығына салып, отырып тұру;
Салмағы 500 кг арбаны 10 метрге сүйреу.
Жерлесіміз Азамат Мақұлбеков бөрене көтеру сайысында 130 келі бөренені 38 рет көтеріп өз рекордын жаңартты. Сондай-ақ ауыр найзаны нысанаға лақтыру сайысында да ең үздік нәтижені көрсетті. Ақтық сында, Азамат Мақұлбеков 100 кг салмақтағы серкені 7 рет көтерді. Жарысқа қатысушылар ішінде ең аз салмақта өнер көрсеткен жерлесіміз жарты тонналық арбаны құмның үстінде 12,9 метрге сүйрейді. Қортындысында, Қазақстандық алып барлық кезеңде көш бастап, жеңімпаз атанды.
Жалпы алыптар бәсекесіне Испания, Үндістан, Қытай, Кувейт, Татарстан, Иран, Ресей қатарлы 16 мемлекеттен 16 спортшы бақ сынаған болатын.
Алыптар айқасының аламан бәйгесін жеңіп алған жерлесімізді жеңіспен құттықтаймыз!
