Жуырда Мыңбұлақ ауылы, Қосбұлақ елді мекенінде «Гүлсая» балабақшасы ашылды. Ашылу салтанатына аудан әкімі Р.Жолдас құттықтау сөз сөйледі. Мұнан соң ауыл имамы Қ.Рахметов, ауыл тұрғыны Ө.Тәшімбетов, ата-аналар тарапынан З.Бектұрғанова сөз алып, ғимараттың салынуына үлес қосқан азаматтарға ризашылықтарын білдірді. Жиылған жұртшылыққа кішкентай бүлдіршіндер концерттік қойылымын ұсынды.
Кезінде білім ордасы болған, бірақ уақыт өте келе тоз-тозы шығып, қаңырап бос қалған ғимаратқа құрылыс жұмыстарын жүргізуге қазынадан 7,377700 млн теңге бөлініп, оны «Көркем-құрылыс» ЖШС-і (директоры Э.Болатбеков) талапқа сай жөндеді. 10 бөлмелік балабақша жайы 50 орынға лайықталған. «Гүлсая» балабақшасының меңгерушісі Г.Мырзабаеваның айтуынша, шағын орталықта тәрбиеші, аспазшы, кіші буын қызметкерлері барлығы 24 адам жұмыспен қамтылған.
Б. НҰРАЛЫҰЛЫ
