Шымкентте тағы да төтенше жағдай орын алды. Таңертеңгі сағат 9 жарымдар шамасында Тәшенов көшесінің бойында өсіп тұрған ағаш жерге құлады. Құдай сақтағанда адамдар зардап шеккен жоқ.
Дегенмен, көшенің бойында тұрған көліктердің біразын бүлдіріп кеткен. Куәгерлердің айтуынша, 3 көлікті құлаған ағаштың бұтақтары сырып кеткен. Бірінің, тіпті, шамдарының күл-паршасы шығып, терезе тазалағышын жұлып алған.
Құлаған ағаш электр сымын үзіп кеткен. Соның салдарынан Тәшенов көшесі мен Тәуке хан даңғылының қиылысындағы бағдаршам істен шықты. Көшеде кептеліс болып, көлік қозғалысын қалпына келтіру үшін инспектор келді.
Бұған қоса құлаған ағаштың дәл қасында өсіп тұрған тағы бір ағаш қисайып тұр. Ол да кез келген уақытта құлап түсуі ғажап емес.
