Сарыағаш сапарында облыс әкімі аудан әкімінің атқарған жұмыстарына көңілі толмады. Себебі, осыдан 3-4 жыл бұрын берілген тапсырмалар орындалмаған.
Бұған дейін ауылшаруашылығын дөңгелетіп, жылыжайымен жұртшылыққа үлгі болып жүрген Сарыағаш ауданында төрт-түліктің дамуы көңілге қонымды емес.Әсіресе, мал бордақылауда артта қалып келеді. «Сыбаға» бағдарламасының орындалуы бойынша соңғы орында тұр. Аудандағы шаруа қожалықтарының тіршілігімен танысқан облыс әкімі тағы да сын айтты.
Тәулігіне 15 ірі қара мен 5 жылқы, 50 бас уақ мал соятын кәсіпкер жылына 3 миллион теңге табыс табады. 9 тонналық мұздатқышы да бар. Сарыағаш ауданына қарасты Қызылжар ауыл округіндегі «Ар-Сен» өндірістік кәсіпорны 2005 жылы мал сою және бордақылау ісіне білек сыбана кіріскен. Ауылдың 12 азаматы күн-түні еңбек етеді. Бір өкініштісі кәсіпкер ірі қаралардың күніне қанша келі салмақ қосатынын басып айта алмады. Сұраққа мардымды жауап ала алмаған өңір басшысы, жауаптылардың жауапсыздығын тілге тиек етіп, «Сыбаға» бағдарламасының орындалу барысын жылдамдатуды тапсырды. Өйткені 300 мыңға жуық тұрғыны бар ауданда мал бордақылайтын бес қана бекет бар. Сондықтан болар мал шаруашылығын дамыту бұл ауданда кенжелеп келеді.
Сондай-ақ, 154 елді мекеннің басын қосқан Сарыағаш ауданында небәрі 29 ауылда ғана тәулігіне тоқтаусыз таза су ағады. Тағы 6 елді мекенге ауыз су 12 сағат берілсе, 23-іне тіршілік нәрі 8 сағат қана таратылады. Ал «тірлікті басына барып қылдық, жұртты суға қарық қылдық» деген аудан әкімінің шаруасы тек қағаз бетінде ғана атқарылғаны анықталды. Сарыағашта қара суға зар халық көп. Сарыағаш қаласы мен елді мекендерді ауызсумен қамту мақсатында құрылысы осыдан үш жыл бұрын басталған магистралды су құбырының жұмысы бітер емес. Бітсе сегіз бірдей ауылға ауызсу барады. Облыстық бюджеттен 535 млн. теңге бөлінген құрылыстың барысымен танысқан өңір басшысы Асқар Мырзахметов мердігер компанияға құрылысты қыркүйекке дейін бітіруді тапсырды. Ал аудан әкімі Әбдібақыт Мақұлбаев басты мәселені шешуде барын салып жатқанын баяндағанымен, жұмыс тек қағаз жүзінде істелінген болып шықты.
Су демекші, Сарыағашта «Рамадан» ирригациялық каналының қала ішінен өтетін 19 шықырымын темір-бетонмен қаптап, күрделі жөндеуден өткізу керек екен. Өйткені аймақта орналасқан 280 үйді су басу қаупі бар. Аудан активімен кездескен Асқар Мырзахметов білім саласындағы былықтарды жоятын , ең бастысы аудындық білім бөлімінің басшысын ауыстыратын кез келгенін баса айтты.
Айтпақшы, ауылының қоқысын тазалай алмай отырған төрт ауыл-округтің әкімдері сайлаудың тізіміне іліккеніне наразылық білдіріп, қолда бар техникасын дұрыс пайдаланып, қоқысын тазаламай отырған олар елді қалай басқармақ деп сұрақты төтесінен қойды.
