Шымкентте газға қатысты тағы бір келеңсіз жағдай орын алды. Бұл туралы ТВК телеарнасы хабарлайды.
Жарылыс 26-желтоқсан күнгі сағат 16:00 шамасында Абай даңғылының бойында орын алды. Осындағы үйлердің бірінде орналасқан жекеменшік клиникада жарылыс болған.
Бұл жайында тілшілерге жергілікті тұрғындар хабар берген. Олардың әрқайсысы жарылыстың дауысын түрліше естігендерін айтады. Ал бір тұрғын клиниканың жертөлесінде газбен байланысты жұмыстың жүргізіліп жатқанын көріпті.
Оқиға орнына тез арада полиция экипажы мен өрт сөндірушілер бригадасы келіп жетті. Тәртіп сақшылары көшенің осы бөлігіндегі қозғалысты жауып, адамдарды алысқа алып кетті. Алдын ала мәліметтерге қарағанда, оқиғадан үш адам зардап шеккен.
Абырой болғанда жарылыстан кейін өрт шыққан жоқ. Қазіргі уақытта жарақат алған адамдарға дәрігерлік көмек көрсетілген. Ал облыстық төтенше жағдай департаментінің мамандары болған жайға кейінірек түсінік береміз деп уәде берді.
