Ордабасы аудандық мәдениет үйінде «Ардагерім – ардағым» қайырымдылық акциясы өтті. Шараның шымылдығын жырмен түрген айтыскер ақын Н.Есенқұлов халқымыздың табиғатында бар қайырымдылық жасау шарасы ойдағыдай жалғасын табатынына сенім білдірді.
Аудан әкімі Самат Сапарбаев соғыс ардагерлерін қамқорлыққа алу жолында атқарылып жатқан іс-шараларға шолу жасады. Жалпы, бүкіл еліміздегідей Ордабасыда құрметті жандарға жасалған, жасалмақ қамқорлық көп-ақ. Бүгінде көрсетілер көмектердің бірқатары нақтыланып қойылған. Мәселен, 11 соғыс ардагерінің екеуінің үйі күрделі, қалғаны ағымдағы жөндеу көрмек екен. «Елден майданға аттанғандардың, тыл еңбеккерлерінің есімдері жазылған ескерткіш тақта орнату, ардагер аналарға арнап мүйіс ашу да ойда. Ауған соғысының ардагерлері де назардан тыс қалмайды. Орталық алаңдағы аллея, Батырлардың мүсіндері жөнделеді. Бүгінгі өтіп отырған қайырымдылық акциясы — жақсы істің басы ғана. Бұл игілікті шара жалғасын табады. Акция барысында түскен қаржы арнайы құрылған комиссияның шешімімен жұмсалады. Оған әкімдік араласпайды», — деген аудан әкімі ортаға қойылған жәшікке алғашқы болып үлестерін салды. Ол — аудан әкімі аппараты қызметкерлерінің бір күндік жалақы қоры екен. Аудандық «Дәулеталыұлы Бегалы ата» мешітінің наиб имамы Н.Шалхарұлы сөз алып, қайырымдылық көрінісінің пайғамбар заманынан бастау алатынына мысал келтіріп, тағылымды әңгіме айтты. Бұдан кейін мекеме, ұйым атынан олардың басшылары, кәсіпкерлер сахнаға көтеріліп, қоржындағыларын ортадағы жәшікке тастады.
Дәурен ӘБДІРАМАНОВ
«Оңтүстік Рабат», №10, 11.03.2015
