Бүгін қылмыстық істер жөніндегі ауданаралық мамандандырылған сотта Бондо Стуруа лақап атымен танылған халықаралық ұрыға қатысты алғашқы тыңдау өтті. Сотқа төрағалық еткен Әбинұр Қарабаев Бондо Стуруа немесе қазақстандық Бонд есімімен белгілі болған күдіктіні аты шулы әккі адам деп есептейді. Оған еліміздегі қылмыстық ұйымға басшылық жасап, халықаралық қылмыстық серіктестерін қаржыландырған деген айып тағылған.
[youtube]https://www.youtube.com/watch?v=KMP61DUIeT8[/youtube]
Айыпталушы, Бондо Стуруа сот отырысына ақ жейде мен мінсіз қара костюмде келді. Осымен судья алдында 5-ші рет жауап беріп жатса да, еңсесін тіктеп ұстады. Ашық түрде өткен отырыс орыс тілінде жүргізілді. Екі жақтың міндеттері мен құқықтары түсіндірілген соң, прокурор күдіктіге қатысты айыптауды баян етті. Прокурордың айтуынша, Бондо Стуруа Қазақстандағы қылмыстық серіктестікке басшылық етіп, халықаралық қылмыстық бірлестікті қаржыландырып отырған. Онымен қоймай, еліміздегі түзеу мекемелерінде жазасын өтеп жатқан қылмыстық авторитеттерді осы ұйымға тартқан.
Бондо Стуруа 2014 жылдың 13 наурызында Мәскеуде қолға түскен болатын. Содан кейін оны Қазақстанға жер аударып, Шымкенттегі тергеу изоляторына қамаған.
Стуруа жазасын өтеу барысында түзеу мекемесінің шарттарына мойынсұнбай, сорақы тәртіппен бірнеше рет көзге түскен. Тексеру барысында, қалтасында рұқсат етілмеген заттарды алып жүргені анықталды. Сондай-ақ, қоғамдық жұмыстарды орындаудан бас тартқан.
Алайда, айыпталушы «тағылған айыппен келіспеймін» деп отырыста бой бермеді.
Осы уәжден соң судья бірден тараптарды қайта тергеуге кірісті. Сұрақ-жауап жаңадан өрбіді. Істің ақ-қарасын ажырату үшін келесі жолы түзеу мекемесіндегі жазасын өтеушілер мен өзге де тұлғалар қайта сұралмақшы.
Мақсат Жақсыбаев
