Қазақ қаламгерлерінің түркиялық оқырмандары көбеюі мүмкін. Стамбұлдан келген белгілі ақын-жазушылар облыс әкімінің орынбасары Ерлан Айтахановпен өткен кездесуде осылай деді.
Айтуларынша, бүгінде санаулы жазушының шығармалары шет тіліне аударылған. Ал сұраныс көлемі күн санап артып жатыр. Сондықтан, түркиялықтар біздің қаламгерлердің әдеби туындыларын аударып, оны өз елдерінде таныстыруды қолға алмақ.
Жиынға Башқұртстан композиторлар одағының төрағасы Нұр Дауытов пен Қырғызстанның композиторы Түгелбай Қазақов, көршілес Өзбекстанның академигі Мирполат Мирзо арнайы келді. Қазақ ақындарының өлең жолдарына жазған әндерін таныстырды. Қарақалпақстандық журналист Айжамал Қожамұратова да күнгейлік жазушылардың еңбектеріне деген құрметін ерекше атап өтті.
Ақын-жазушылар өзара шығармашпалық байланыс орнатуға ұсыныс жасасты. Ал меймандарды қабылдаған облыс әкімінің орынбасары Ерлан Қуанышұлы шетелдік қонақтарға алғыс хаттар тапсырып, еңбектеріне шығармашылық табыс тіледі.
Фатма Хатун Есен, ақын, жазушы (Түркия): «Қазақ қалагерлерінің ой ұшқырлығына, идеологиясына таң қаламын. Шытырманға толы шығармалар бастапқыда кейіпкердің өмірінен басталып, ортаңғы оқиғада жалпыға өтеді, қоғамдық мәселелерді қаузайды. Соңында түйінді оқырманның ойымен, онымен бірлесе отырып тарқатады. Осылайша Оңтүстіктің жазушылары халықты тәрбиелейді. Әріптестерімнен осы тәсілді меңгергім келеді. Ал жазушыларына қолдау көрсетіп жүрген жергілікті билік өкілдерінің еңбегі жана берсін!»
