Оңтүстікте өткен «Қала сыртындағы жол» шарасы кезінде 2000-ға жуық ережені бұзу жағдайы тіркелді. Бұл рейд жергілікті полиция қызметінің бастамасы бойынша 16-17 шілде аралығында өткен еді.
Инспекторлардың 2 күндік рейді барысында анықталған 2000-ға жуық жүргізушінің 400-ге жуығы рөлде отырып, телефонды пайдаланса, 600 адам қауіпсіздік белдігін тақпаған.
Ал жылдамдықты арттыруға қатысты 59 хаттама түзілді. Сонымен қатар көлік құралын мас күйінде жүргізген 28 жүргізуші ұсталып, 72 жаяу жүргіншіге жол қозғалысы ережесін бұзғаны үшін айыппұл салынды. Бұған қоса 6 жүргізуші қарсы беттегі жолға шығып кеткені үшін жазаланды.
Еске салайық, Қазақстанның әкімшілік құқық бұзушылық туралы кодексіне сәйкес, көлік құралын мас күйінде жүргізген жүргізушілерге көлік құралын басқару құқығынан 3 жылға айыру шарасы көзделсе, қарсы жолға шығып кеткені үшін 1 жылға дейін көлік жүргізу құқығынан айыру шарасы қарастырылған. Сондай-ақ, жылдамдықты арттыруға байланысты ережені бұзғандарға 10-15 АЕК аралығында (21 210 теңгеден 31 815 теңгеге дейін) дейiнгi мөлшерде айыппұл салу қарастырылған.
