Жылуға ақы төлемегендер жауапқа тартылады. «Қуат жылу орталығы-3» мекемесінің қызметкерлері жеке сот орындаушыларымен бірлесіп, рейдке шықты.
Жауаптылар жылуға есеп айырыспаған азаматтарға соттың шешімін таратып, тұтынған жылу ақысын төлеуге шақырды. Өткен жылу маусымында қалған қарыз — 190 млн теңге.
Мұнша қарыздың 184 млн теңгесі көп қабатты үйлердің тұрғындарына тиесілі болса, қалған 6 млн теңгесі — заңды тұлғалардың берешегі.
Әбдісаттар Душанов, «Қуат жылу орталығы-3» мекемесінің бөлім бастығы: «Заңды тұлғалар 6 млн теңге қарыз. Олар — облыс әкімдігі, білім беру басқармасына қарасты мекемелер және төтенше жағдайлар жөніндегі басқармалар.»
Қазіргі таңда сотқа 1914 іс жіберілген. Олардың 86-ы бойынша соттың шешімі шығарылыпты. Соттың шемімі бойынша берешекті өтеуге жеке сот орындаушылары жұмылдырылған.
Нұржан Ахметов, жеке сот орындаушысы: «Қазір менде 86 сот шешімі бар. Борышкер 10 күнде төлемесе, айыппұл төлейді және мүліктері тәркіленеді. Және есеп-шоттары жабылады.»
Қарызын төлемей, қашып жүргендер заң алдында жауап береді дейді рейдке шыққандар. Егер соттың шешіміне құлақ түрмесе, келер жылдан бастап, жылудан қағылуы әбден мүмкін.
