«Жұлдыздарға қара» жобасының жеңімпаздары белгілі болды. «Даму» кәсіпкерлікті қолдау қоры мен Қазкоммерцбанктің «Кұс жолы» қайырымдылық қорының бастамасы нәтижесіз емес. Алғашқы үш ісмер 300 мың теңге грант ұтты. Осы ақшаға жеңімпаздардың өз кәсібін дөңгелетуі үшін қажетті жабдықтар сатып алынған. Тиімді жобалар ретінде құс өсіру, тігін цехы мен құрылыс материалдарын дайындау ісі таңдалды. Қаржылай қолдауға ие болғандар енді жұмысқа білек сыбана кірісеміз деп отыр.
Мүмкіндігі шектеулі азаматтардың кәсіпкерлік белсенділігін қолдауды мақсат еткен бұл шара еліміздің барлық өңірлерінде қолға алынған. «Даму» кәсіпкерлікті дамыту қоры мен «Құс жолы» қайырымдылық қорының мамандары жоба бойынша түскен барлық 15 өтінішті қарап, ең тиімді деген үшеуін үздік деп тауыпты. Олардың әрқайсысы 300 мың теңгелік грантқа ие болды. Таласбаевтар отбасына инкубатор фермасы қажет болатын. Бөлінген ақшаға қажетті жабдықты алып берген азаматтарға алғысын жаудырды.
Екінші грант иесі Әбдуалим Құлахмедовтың кәсіпкерлікпен айналысқанына 3 жыл болыпты. Байқауға алғаш рет қатысқан мүмкіндігі шектеулі азаматқа «Даму» қорының қызметкерлері бизнес-жоспарын құруға көмектескен. Өзінің қайсарлығы, өмірге деген құштарлығының нәтижесінде ол жеңімпаз атанды. Енді құрылыс бұйымдары мен кәдесыйлықты кедергісіз жасайтын болдым деп қуанады. Онда енді кәсіпке қажетті барлық құрылғылар бар.
Лолита Садвақасова да сүйікті ісімен айналысатын болды. Тігін цехына қажетті техникаға қол жеткізген шебер балаларға киім тігіп, жергілікті сауда орындарында сатпақ. Ең бастысы, кәсіпкер өзгелерді де жұмыспен қамти алатын болды.
Ұйымдастырушылар кәсібін ашамын деген азаматтарды шақырады. Жұмыс істеймін деген жанға жағдай жасауға дайынбыз дейді. Құлшынысы барларға бағдар беріп, бастапқыда бизнес жоспарларын да жасауға көмек беріледі.
