Шымкент халық санының көбейуімен мақтанса да демографияға үлесін қосып жүрген кейбір аналардың жағдайы мүшкіл. Дүниеге бірнеше сәби әкеліп, балаларын баға алмай қиналып жүргендер жетерлік. Соның бірі, жеті баланы жалғыз өзі асырап отырған ана жұрттан көмек сұрайды. Шиеттей балаларының төртеуі киерге киім мен мектеп құралдарының жоғынан мектепке бара алмай отыр.
Айнұр Жұманованың жетінші баласы туылған кезде заңды некедегі күйеуі асырай алмаймын деп тайып тұрыпты. Тіпті алимент те төлемейді екен. Ал балаларының нанын әрең тауып беріп отырған ана оларды шарасыз оқудан қағып отырғанына қынжылады. Мектепке баратын төрт баласының киерге киімі, дәптер-қаламының жоғынан қатарластарынан қалып отыр.
— Дүкендерден қарыз алайын десем, 4 мың теңгедей қарызым бар. Алдымен соны құтылып алмасам, бермейді азық-түлікті. Амал жоқ, енді құр вермишельді қайнатып, нан беріп отырмын. Бұлар мектепке барғысы келеді, жіберейін десем, киімі жоқ, — дейді жалғызбасты ана.
Үйдің үлкені, жиырмаға толған баласы анасының жағдайына қарап, оқудың орнына жалдамалы жұмыс істеп, кейде аз болса да бауырларына азық-түлік тауып тұрады екен. Ал мектепке баратын балалары сыныптастарынан ұялып, бізге жауап бергісі келмеді. Тек 3 сыныпта оқитын баласы Алданұр мектепті қатты сағынса керек, көз жасын тия алмады.
Айына небәрі 14 мың теңге жәрдемақы алатын Айнұр Жұманова шиеттей балаларымен суға қайнатқан кеспемен күнелтіп келемін дейді. Алған жәрдемақысынан үнемдеп, мемлекеттің жалға берген баспанасына айына 5500 теңге пәтерақысын төлейді. Азды-көпті жәрдемақыны қайда тартарын білмеген ана жарығының ақысын төлей алмай, қараңғы бөлмеде отыр.
Атқамінерлер бұл азаматшаның жағдайын жақсы біледі. Батыр ана мүшкіл жағдайын айтып талай есікті сығаласа да өзіне тиесілі жердемақыдан бөлек басқа көмек берілмейтінін айтып, шығарып салған екен. Тұрақты жұмысы жоқ жалғызбасты ана енді көпшіліктен көмек сұрап отыр. Жомарт жандардың мейіріміне мұқтаж әйел, тым болмаса, балаларына киім -кешек пен азық түлік сұрайды.
