Түркістан қаласында «Түркістан – Түркі әлемінің мәдени астанасы» жылының салтанатты ашылуы мен Наурыз мерекесіне арналған Түркі әлемінің «Наурызнама» іс-шарасы өтті. 23 мемлекеттен келген 300-ге тарта қонақ, ТҮРКСОЙ халықаралық ұйымының өкілдері, ақын-жазушылар мен өнер тұлғалары, облыс тұрғындарын қосқанда жалпы саны 10 мың адамды Қожа Ахмет Яссауи кесенесінің айналасына жинаған «Наурызнама» іс-шарасы таңғы сағат 11:00-де басталды.
Облыс әкімі Ж. Түймебаев пен ҚР Мәдениет және спорт министрі Арыстанбек Мұхамедиұлы, «ТҮРКСОЙ» Халықаралық Ұйымының Бас хатшысы Дүйсен Қасейінов бастаған топ Қожа Ахмет Яссауи кесенесі мен оның айналасына жерленген қазақ хандары, абыз-әулиелері, билері мен батырларына арналған пантеонмен танысып, зиярат етті.
Кесенеден шыққан меймандар Түркістан тарихи музейін аралап, ондағы жәдігерлермен танысты.
Музейден шығып, Түркістанның Арбаты атанған алаңды бойлай қоныстанған қолөнер шеберлерінің ауылын аралады. Ауыл арасындағы түрлі этномәдени орталықтардың ән-күйін тыңдап, ұлттық билерін биледі.
Түскі сағат 12:00-де Есім хан атындағы Орталық алаңда «Түркістан — Түркі әлемінің мәдени астанасы» жылының ашылу салтанаты басталды.
С. Мадуанидің сөзіне жазылған Б. Сердәлінің «Түркістаным-Тұраным» әні орындалып, осы ән шырқалып жатқанда 8 облыстық театрдың әртістері жарау-жарау атқа мініп, түркітілдес мемлекеттердің туларын алаңға алып шықты. Әр туды жеке-жеке арнайы тұғырға орнатты.
Ашылу салтанатында ОҚО әкімі Ж. Түймебаев жұртшылықты «Түркістан – түркі әлемінің мәдени астанасы» жылының салтанатты ашылуымен және де Ұлыстың Ұлы күні Наурыз мерекесімен құттықтады.
«Түркі дүниесінің текті төріне, түбі бір, тамыры терең туысқандардың рухани бас қаласы Түркі әлемінің биылғы мәдени астанасына қош келдіңіздер! Ұлыстың Ұлы күні ұлық мерекеміз Әз-Наурыз мейрамы құтты болсын. Наурыз — жаңалық пен жақсылықтың, мейірім мен имандылықтың, жаңару мен жаңғырудың, ерен еңбек пен бауырмалдық-достықтың, ықылас пен ынтымақтың, береке басы бірліктің мерекесі. Түркістан — Түркі халықтарының туы тігілген орта. Түркістан түркі елдерінің түп қазығы…. Түркістан — ардақты бабабамыз, данышпан ойшылымыз, дара да Әзірет сұлтанымыз Қожа Ахмет Яссауидің асыл сүйегін аялай тербеткен, әруағын асқақтатқан ата –бабаларынан қалған ұлы мұрасы. Қадірменді халайық, ата бабамыз аңсаған туыстар, қасиетті топырақтағы қадамдарыңызға сауапты молынан жазсын. Ниеттеріңіз қабыл, мұраттарыңыз асыл болсын»-деді Ж. Түймебаев.
Содан кейін сөз алған ҚР Мәдениет және спорт министрі Арыстанбек Мұхамедиұлы да Ұлыстың Ұлы күні әз Наурызбен құттықтады.
«Рухани астанамыз Түркістан қаласының 2017 жылы Түркі әлемінің мәдени астанасы болуы да заңдылық. Әрине, алда келе жатқан Астана ЭКСПО-2017 халықаралық көрмесін өткізуге бәріміз атсалысамыз»-деді министр.
Министрден кейін «ТҮРКСОЙ» халықаралық ұйымының Бас хатшысы Дүйсен Қасейінов «Бұл қала — түркі әлемінің ұлы ақыны, рухани ұстаз, түркі мұсылмандығының негізін салушы, Қожа Ахмет Яссауидің мәңгілік мекені, сырын ішіне бүккен талай-талай өркениеттердің куәсі, ғасырлар бойғы ата-бабаларамызыдың қаны төгіліп, табанының қаны , маңдайының тері сіңген жер» деп атады.
«Бұл қаланың түркі әлемінің мәдени астанасы болып жариялануын ерекше маңызға ие оқиға деп білемін. Мәдени астана мәртебесіне орай жыл бойына Түркістан, Шымкент қалаларына ондаған ірі мәдени шаралар өткізіледі. Ең бастысы, биыл бұл өңір түркі әлемінің туристері мен мәдениет қайраткерлерінің жиі бас қосатын, зияратқа келетін мәдени орталығына айналады»-деді ТҮРКСОЙ-дың бас хатшысы.
Ол ТҮРКСОЙ Халықаралық ұйымының «Баспасөз сыйлығын» шетелдік және қазақстандық 15 үздік журналистке тапсырды.
Ресми ашылу салтанаты TURKSOY сөзі жазылған үлкен шар мен түркітілдес мемлекеттердің тулары бейнеленген кіші шарларды біріктіріп, аспанға ұшырумен аяқталды.
Түркістан жерінде «Наурызнама» басталды
Сөйтіп «Наурызнама» мерекелік концертіне ұласты. Ең алдымен 500-ге жуық биші күн мен түн, жұлдыздар бейнесінде «Күн мен Түннің теңелуі және Табиғаттың оянуы» театрландырылған сазды-хореографиялық қойылымын көрсетті.
«Наурыз думан» театрландырылған сазды-хореографиялық қойылымында «Сүгір» атындағы ұлт аспаптар оркестрінің музыкалық сүйемелдеуімен «Оңтүстік Цирк» мекемесінің әртістері ат үстінде түрлі трюктерін паш етті.
«Наурыз» келгені жөнінде сүйінші сұрап, шашу шашты. Алаңда Түркітілдес мемлекеттерге арналған 6 киіз үй көтеріліп, Түркітілдес мемлекеттердің «Наурыз» керуені жетті. Керуенде 18 түйе, 30 ат, 4 арба бар. Әзірбайжан, Қырғызстан, Өзбекстан, Түркия, Түркіменстан, Болгария, Босния және Герцеговина, Греция, Косово, Мажарстан, Моңғолия, Молдовадан Гаагауз елі, Македония, Румыния, Солтүстік Кипр, Сербия мемлекеттерінің және Ресей Федерациясының Алтай, Башқұрт, Қалмық, Татар, Саха-Якут, Чуваш республикаларының өнерпаздары, облыстық 8 кәсіби театрдың әртістері және этномәдени бірлестік өкілдері ұлттық киімде жүріп өтті.
Түркітілдес халықтардың ұлттық билерін билеп, достық пен бауырластықты үндеді.
Достық биінен кейін ортаға ырыс-берекенің символы Тайқазан әкелінді. ҚР мәдениет қайраткері Хадиша Шалабаева «Наурыз думан» әнін әуелетті.
Ш. Қалдаяқов атындағы облыстық филармонияның, облыстық опера және балет театрының әншілері және барлық іс-шараға қатысушылар хормен «Түркі әлемінің Наурыз тойы» әнін шырқады.
Мәдени астана — Түркістан күллі түркі жұртын бесігінде тербетті
Nai-post ni Оңтүстік Қазақстан Облысының Әкімдігі Акимат Южно-Казахстанской области noong Martes, Marso 21, 2017
«Түркістан-Түркі әлемінің мәдени астанасы» жылының аясында, Наурыз мерекесіне орай, Түркістан қаласында Түркі әлемінің «Наурыз» Халықаралық ақындар айтысы мен Түркі әлемінің «Бұраң бел» би фестивалі өтеді.
