Жыл сайын өтетін «Шапағат» республикалық өнертапқыштар байқауында биыл шымкенттік оқушылардың жолы болды. Еліміз бойынша қатысқан 16 команданың ішінен қос өнертапқыш Сымбат Орынбасар мен Диана Әділхан екі жүлделі орынға ие болды. Қаламыздағы Ы. Алтынсарин атындағы №65 мектептің қос оқушысы «Көлік саласы туралы үздік жоба» номинациясы бойынша жұмыстарын ұсынған.
Диана Әділхан «Біркелкі ұшудың авиациялық моделі» жобасын дайындапты. Яғни алдымен ұшақты емес, оның моделін дайындаудың артықшылықтарын көрсеткен. Сымбаттың жұмысы да ерекше. Өйткені өндіріске жаңадан енген ұшқышсыз ұшу аппаратының барлық мүмкіндіктерін егжей-тегжейлі зерттепті. Тіпті оның арнайы күн көзі арқылы қуаттандыруға болатыны туралы еңбегі де бар.
Байқау кезінде оқушылар өз жобаларын тек ағылшын тілінде қорғап қана қоймай, түрлі тапсырмаларды орындаған. Аэроғарыштық жарыстар жөнінде түрлі шеберлік сабақтарға қатысып, болашақтықтармен жүздеседі.
Сымбат Орынбасар мен Диана Әділханның қуанышында шек жоқ. Қазір жас ғалымдар Лондонға ұшып кетті. Енді олар Granfield университетінде өзге де дарынды оқушылармен бірге түрлі танымдық сабақтарға қатысады, бірегей жобаларын таныстырады. Оны ары қарай дамытуға мүмкіндік алады.
