Оңтүстік Қазақстан облысының әкімдігі мен түркиялық «Dogus Constraction» компаниясы арасында Өгем өзенінің суын бұру мақсатында ынтымақтастық меморандумы түзілді. Енді аталған шетелдік компания өкілдері осы уағдаластық аясында тұжырымдама әзірлемек. Бұл жұмыстар 2018 жылдың қаңтарына дейін аяқталса, одан кейін жобаның техникалық экономикалық негіздемесі мен жобалау-сметалық құжаттамасын әзірлеу жұмыстарының кезеңдері басталады.
Бұл туралы түрік компаниясының өкілдері облыс әкімі Жансейіт Түймебаевтың алдында таныстырылым жасап, «Dogus Constraction» компаниясының Қазақстандағы өкілі Юнус Эмре Суджу мен облыс әкімінің бірінші орынбасары Дархан Сатыбалдының арасында аталған құжатқа қол қойылды.
Облыстық энергетика және тұрғын үй-коммуналды шаруашылығы басқармасы мамандарының мәліметінше, жоба іске асқанда Өгем өзенінде гидротехникалық ғимарат салынып, одан үш ауданға – Сарыағаш, Мақтаарал және Қазығұртқа 3-3,5 м3/сек көлемде су тартылады. Одан соң тартылатын суағарлар бойынан шағын су электр стансалары бой көтеріп, 51,7 МВт электр қуаты алынады деп күтілуде.
Сонымен қатар, аталған жоба іске асқан жағдайда, облыстың Қазығұрт, Сарыағаш және Мақтаарал аудандарының 400-ге жуық елдімекеніндегі 700 мыңнан аса тұрғын сапалы ауыз сумен қамтамасыз етіліп, ауыз суға байланысты мәселе толық шешімін табады.
Еске салайық, Өгем өзені көршілес Өзбекстанның аумағында ішінара орналасып, трансшекаралық өзендер қатарына жатқандықтан, осы жылдың ақпанында Қазақстан мен Өзбекстан Республикалары үкіметінің бірлескен жұмыс тобы бас қосқан болатын. Онда қос елдің өкілдері екіжақты ынтымақтастықты жетілдіру мәселелері бойынша отырысында Өгем өзенінің суын бұру келісілді.
ОҚО әкімінің баспасөз қызметі
