Шымкент қаласында жаяу жүргіншілерге арналған «Арбат» жобасы қай көшеде ұйымдастырылатыны анықталды. Қаладағы бірқатар көшелерді жұмысшы топпен аралап шыққан облыс әкімі Ж.Түймебаев қай көшелердің мәдени демалыс орны болатынын мәлім етті.
Түрлі өнер адамдарының басын қосатын мәдени демалыс орны енді қаладағы Қошқар ата бойы мен Бекет батыр, Асқаров және Бейбітшілік көшелері бойында орналаспақ. Бүгінде арбаттың жобасы жасалынып, аймақ басшысына ұсынылған. Сонымен қатар, бүгінгі жұмысшы топ құрамындағы облыс мәслихатының депутаты Ө.Мелдеханов аталған жоба бойынша өзінің бірқатар ұсыныстарын жеткізді.
Айта кетейік, мұндай ашық аспан астындағы көрмені қолға алу идеясын өңір басшысы Ж.Түймебаев көтеріп, оны жүзеге асыруды қала әкімдігіне тапсырған болатын. Осылайша, таяу күндері қала орталығынан Шымкенттің өз «Арбаты» пайда болып, онда шаһар тұрғындары мен қонақтары жексенбі және мереке күндері суретшілердің көрмесін, кәдесыйлардың алуан түрлерін тамашалай алатын болады.
Сапары барысында облыс әкімі аталған көше бойындағы тұрғындармен тілдесіп, сол көшеде ұйымдастырылатын «Арбат» демалыс орны туралы пікірлерін тыңдады. Сондай-ақ әкім бұл жобаны жүзеге асырудың басты мақсаты ұлттық құндылықтарды дәріптей отырып, тұрғындардың қазақ халқының дәстүрі мен тарихына деген қызығушылығын ояту екенін атап өтті.
