Наурыз айының 17-24-і күндері Финляндияның Хельсинки қаласында «Жұмбақ Жібек жолы» Халықаралық ашық ортаазиялық фестивалінде Қазақстанның атынан бірқатар өнер жұлдыздары өнерін паш етпек.
Олардың қатарында облыстық опера және балет театрының солистері Ерлан Жандарбай, Үрәлхан Сейлбекова, Ш.Қалдаяқов атындағы облыстық филармония артисі Ұлбала Ермұхаметова, облыстық мәдениет және халық шығармашылығы орталығының бөлім басшысы Мұратбай Нұрмағанбетов және дәстүрлі әнші Абылайхан Оспановтар өнер көрсетуде.
Сонымен қатар, 2018 жылғы «Түркі әлемінің мәдени астанасы» жобасының ашылу салтанаты аясында 18-26 наурыз аралығында Түркияның Кастамону, Анкара, Болу, Ыстамбұл қалаларында, сонымен қатар, 24 наурыз — 6 сәуір аралығында Болгария, Македония, Босния, Албания, Черногория мемлекеттерінде Халықаралық Наурыз мерекесіне арналған концерттерде Қазақстанның атынан оңтүстікқазақстандық өнер ұжымдары, 2017 жылы Түркияның Бурса қаласында өткен 31-ші Халықаралық «Алтын Қаракөз» фольклорлық би байқауының бас жүлде иегері «Қазына» би ансамблі, «Семсер» тобы, Ш.Қалдаяқов атындағы облыстық филармонияның әншілері Наркенже Серікбаева, Айнұр Әбілдаевалар қатысып, түркі елдері арасында қазақ өнерін паш етпек.
