Сайрам ауданының 90 жылдығына орай, аудандық мəдениет жəне тілдерді дамыту бөлімінің ұйымдастыруымен би топтары арасында «Бұраң бел» атты аудандық байқау өтті. Байқауға 12 би тобы қатысып, өз бақтарын сынады.
Байқау шарттарына сəйкес, қазақтың ұлттық биі мен өз таңдауы бойынша бір би орындап, өнер көрсеткен топтар бірінен бірі асып түсерліктей, көрермендерді өз шеберліктерімен, өнерлерімен таңғалдырды. Қазылар алқасының шешімімен жүлдеге лайықты деген топтар таңдап алынды. Байқау қорытындысы бойынша бас жүлдені Сайрам балалар саз мектебінен келген би тобы жеңіп алды, ал 1-орынды Ақарыс ауылдық округінен келген «Бойжеткен» би тобы иеленсе, 2-орынға ОҚ индустриалды-инновациялық колледжі мен гуманитарлық агро-экономикалық колледжінің би топтары ие болды.
3-орынды №93 Абылайхан атындағы ЖОМ мен №5 М.Горький атындағы ЖОМ би топтары иеленіп, жүлделі орын алған топтар дипломдармен жəне бағалы сыйлықтармен марапатталды. Қалған қатысушы би топтары түрлі номинацияларға ие болып, Алғыс хаттармен жəне сыйлықтармен марапатталды. Би өнерінің құдіретін сезініп, киелі сахнада өнерімен өрнектеп, жоғары дəрежеде көрсете білген барша өнерпаздар расында марапатқа лайық өнер көрсетті.
