Ресейде сотталған 112 қазақстандық елімізге қайтарылды. Шет елде сотталғандар елімізде жазасын өтейтін болды. Бұл туралы ҚР Бас прокуратурасының баспасөз қызметі мәлімдеді.
Бас прокурор Қайрат Қожамжаров пен Ресей Федерациясы Тергеу комитетінің төрағасы Александр Бастрыкин кездесіп, «Байқоңыр» кешені аумағындағы өзара қатынас жөніндегі Келісімге қол қойды.
Қазақстанның Бас прокуратурасы соңғы 5 жылда Ресейден сұратылған тұлғаларды беру туралы 131 өтінішхатты қанағаттандырды. Ал, Ресей жағы 272 азаматымызды елге экстрадициялады. Сондай-ақ, 112 сотталған қазақстандық жазасын одан әрі қарай елде өтеу үшін Ресейден алдырылды. Өз кезегінде Ресейге 242 орыс азаматы қайтарылды.
Кездесу барысында тараптар Қазақстан Республикасының Бас прокуратурасы және Ресей Федерациясы Тергеу комитетінің арасындағы ынтымақтастық туралы Келісімге, сонымен қатар «Байқоңыр» кешені аумағындағы өзара қатынас жөніндегі Келісімге қол қойды.
Тараптар бірінші Келісім аясында қылмыстылыққа қарсы іс-қимыл кезінде, қылмыстарды ашу мен тергеп-тексеру барысында әдіс-тәсілдермен бөлісуге, соның ішінде террористік, экстремистік және сыбайлас жемқорлық, экономика мен жоғары технологиялар бағытында тәжірибе бөлісуге келісті.
«Байқоңыр» кешені аумағына қатысты ынтымақтастық туралы Келісім азаматтардың құқықтары мен бостандықтарын қорғауды қамтамасыз етуде, қылмыстық істер бойынша алдын ала тергеп-тексеруді жүргізуде Қазақстан-Ресей серіктестігін одан әрі нығайта түседі.
«Сапар барысында жасалған Келісімдер біздің ынтымақтастығымызға жаңа серпін беріп, бүгінгі күннің қауіп-қатеріне төтеп беруде күшімізді арттырады», — деп өз сөзін қорытындылады Бас Прокурор.
