Елбасының 5 әлеуметтік бастамасының Оңтүстік Қазақстан облысында іске асырылуын бақылау жөніндегі қоғамдық кеңес мәжілісі өтті. Әлеуметтің әлеуетін арттыруға бағытталған шара оң нәтижесін беруде. Ең алдымен жастар үшін жағымды жаңалықтары көп.
Биыл облысымызда жоғарғы оқу орындары және орта арнаулы кәсіптік колледж студенттерін жатақханамен қамту мәселесі шешімін таппақ. Ел елеңдеп күтіп отырған 7-20-25 бағдарламасы арқылы баспанамен қамту жайы да назардан тыс қалған жоқ.
Қоғамдық кеңес отырысы ең әуелі өңіріміздегі қоғамдық кеңестің құрамын бекіту мен төрағасын сайлаудан басталды. Ендігі кезекте кеңестің тізгінін Лесбек Тәшімов ұстамақ…
Жастар үшін де жағымды жаңалық көп. Пәтерден пәтер жалдап көшпендінің күйін кешкен студент жастар баршылық. Бүгінде өңірімізде 153 мың астам студент білім алуда. 11 330 жатақхана орнын қажет етеді, яғни, 28 жаңа жатақхана құрылысын салу қажет. Оның ішінде жоғары оқу орындары студенттері үшін 7 800 орындық 17 жатақхана, ал колледж студенттеріне 3530 орындық 11 жатақханаға қажеттілік бар. Бүгінгі күні 9 колледжге жатақхана құрылысына салу үшін жер 5 гектар жер бөлініп отыр. Бұл жоба мемлекеттік-жекешелік әріптестік аясында жүзеге асатын болады. Баспаналы болу басты арманы болғандарға да қуанышты жаңалық бар.
Арман Сәбитов, облыстық экономика және бюджеттік жоспарлау басқармасының басшысы: «Ағымдағы жылы жеке құрылысшылармен 104 көпқабатты тұрғын үй салынуда. Жыл соңында жалпы алаңы 121 мың шаршы метрді құрайтын 1454 пәтерлі 3 тұрғын үй пайдалануға беріледі. Олардың барығы да «7-20-25» бағдарламасы бойынша берілетін болады. Бүгінгі күнге 6 көпқабатты тұрғын үйдің құрылысы аяқталып, пайдалануға берілуге дайын. Ағымдағы жылы 780 мың шаршы метрді құрайтын тұрғын үйді пайдалануға беруді межелеп отырмыз».
Осылайша өңірімізде әлеуметтік мәселелер оң шешімін таппақ. Әуелгі қадамдар басталып та қойды. Енді нәтижесін көретін күн де алыс емес.
Гүлжан Жұмаш
