Биыл 27 мыңға жуық шымкенттік «Нәтижелі жұмыспен қамтуды және жаппай кәсіпкерлікті дамытудың 2017 — 2021 жылдарға арналған бағдарламасының» шарапатын көрген. Бірі жұмысқа тұрса, енді бірі кәсібін дөңгелеткен.
Бұл туралы бүгін қалалық жұмыспен қамту орталығында өткен семинар-кеңесте айтылды. Мамандар «мемлекеттік қолдау жұмыссыздықты жойып, халықтың тұрмыстық әлеуетін көтеруде» дейді саладағылар.
Әбдірашевтар отбасы бүгін қос қуанышқа кенелді. Бірі педагог, енді бірі медицина қызметкері мамандығын алған келіндері «Жастар тәжірибесі» бойынша бос жұмыс орындарына жолдама алды. Еңбек өтілі болмағандықтан екі қолға бір күрек таппай жүрген олар енді тәжірибе де жинайды, жалақы да алады.
Алдахияр Әбдрірашев, Шымкент қаласының тұрғыны: «Қазір жолдама алдық. Бізге жұмыс берушілердің мекен — жайын берді. Қуанып отырмыз. Енді бір үйден екі адам жұмыспен қамтылып отыр».
Шымкентке арнайы келген министрліктің өкілдері жергілікті мамандармен бірлесіп «Нәтижелі жұмыспен қамтуды және жаппай кәсіпкерлікті дамытудың» 2017 — 2021 жылдарға арналған бағдарламасының орындалуын талқылады. Бағдарлама жетістіктерін насихаттау үшін келген құзырлылар жүзеге асып жатқанына 2 жыл болған мемлекеттік қолдаудың Шымкентте ойдағыдай іске асып жатқанына сендірді.
Құттымұраш Шамшиев, Еңбек және әлеуметтік қорғау министрлігінің ақпараттық тобының мүшесі: «Бағдарламада қаралған жастар тәжірибесі аясында биыл жоспар бойынша 1714 адам жолдамамен қамтылуы тиіс. Жұмыссыздықты жою мақсатында қолға алынған бағдарлама бойынша 19 мыңға жуық азамат тұрақты жұмыс тапқан.
Жасұлан Әлжанов, Шымкент қаласы жұмыспен қамту орталығы бөлім басшысының орынбасары: «Жоспар бойынша бағдарлама аясында 25 мың 600 азаматты қамту керек болған. Біз нәтижелі іс-шаралардың арқасында 26800-ге жуық азаматты қамтып отырмыз».
Айта кетейік, бағдарламаның маңызды бағыты — жаппай кәсіпкерлікті дамыту үшін микроқаржылық ұйымдардың көмегімен 148 адамға несие де берілген. Олар қызмет көрсету саласында, сауда-саттық, мал шаруашылығы салаларында кәсіптерін дөңгелетіп отыр.
Мақпал Рысбаева
