Шымкент қаласындағы «оттегі орталығы» атанған дендросаябақ енді жаңаша атауға ие болды. Қазақстан Республикасы Үкіметінің 2018 жылғы 23-қазандағы N674 қаулысымен Шымкент мемлекеттік дендрологиялық саябағына белгілі мемлекет және қоғам қайраткері Асанбай Асқаровтың есімі берілді.
Қаланың ауасын тазартуға септігін тигізетін саябақ салуға мұрындық болған Асанбай Асқаровтың еңбегі орасан екенін күнгейліктер жақсы біледі. Шымкенттіктер алып аумақты алып жатқан дендрологиялық баққа баяғыдан-ақ қоғам қайраткерінің есімін беруді қолдаған болатын.
Бұрын қаланың қоқыс тастайтын аумағы болған дендрологиялық саябақ 1979 жылы құрылған. Көреген басшы арнайы мамандар шақыртып, иісі мүңкіген аумақтағы бар қоқыс қалдықты тегістетіп, үстіне бірнеше қабат құнарлы топырақ төктіріп, ағаштардың тамыр алып кететіндей бар жағдайды жасауды ескертіп, салдырған. Әлемнің әр түкпірінен әкеліп отырғызылған ағаштар бүгінде ну орманға айналған. Ауа тазартуға септігін тигізетін ерекше иісі бар ағаштар басым мұнда. Тек қана ағаш егіп, өсірумен ғана айналысатын емес, мұнда ғылыми орталық та бар.
Дендросаябақ отандық және дүниежүзілік дендрофлора түрлерін жерсіндіру және кешенді түрде зерттеу мақсатында құрылған. Ең бастысы еліміз бойынша ағаштарды өңірімізде жерсіндіруді жоспарлы түрде жүргізген алғашқы ғылыми мекеме болып табылады. Бұған дейін өңірімізде ғана емес, елімізде мұндай орталық болған емес.
Бүгінде дендрологиялық саябақ қалалықтардың сүйікті мекеніне айналған. Түрлі бөлікке бөлінген аумақты бір күнде аралап шығу мүмкін емес. Кіру ақысы – 25 теңге.
Оңтүстік өңірін гүлдендіру үшін ерен еңбек еткен Асанбай Асқаровтың есімін өзі салдырған әрбір нысанға берсе де артықтық етпейді деп санайды күнгейліктер. Орында да…
