Түркістан облысында астық ору науқаны басталды. Егінге алғашқы орақты қазығұрттық шаруалар салды. Биыл дихандар молынан өнім аламыз деп құлшынып отыр. Алайда аграрлардың ісін артқа тартқан түйінді мәселелер де аз емес.
Былтырғы науқанда аз-кем шығынға ұшыраған диқандар биыл қамбаны астыққа толтырамыз дейді. Жанар-жағармай мен тыңайтқышты бұл жылы дер кезінде алғанымен шаруалардың түйіткілдері әлі де бітер емес. Маман тапшылығы және ғалымдармен байланыстың жоқтығы бүгінгі нарыққа төтеп беруге мұрша бермей тұр.
Ал шаруаға ауадай қажет техника жылдан-жылға жаңартылуда. Бүгінде жарап тұрған мына шетелдік бір комбайн ескі 8 «Ниваның» қызметін атқарады екен. 10 жылға жуық комбайнер болып жұмыс істеп келе жатқан Ерлан Арқабаев заманауи техниканың бірін тізгінге алған.
Биыл түркістандық шаруалар 218 мың гектарға астық еккен. Орташа есеппен гектарынан 22 центрден өнім аламыз деп құлшынып отыр.
Астық ору науқанына қазір 1 мыңнан аса техника сақадай сай тұр. Салаға жауаптылар шаруалар астықты шашпай-төкпей жинап алу үшін бар жағдайды жасаймыз деп сендірді.
Мақпал Рысбаева
