Ресейдің Омбы қаласында сәбилерге Димаш есімі жиі қойыла бастады. Мамандар есім қазақстандық әншінің құрметіне таңдалды деп отыр
Омбы билігі 2019 жылы қалада сәбилерге қандай есімдер жиі қойылғанын айтты. Қала тұрғындары жиі таңдаған есімдер арасында Димаш та бар.
Баспасөз мәслихатында Омбыдағы бала туу көрсеткіші мен ең жиі қойылатын есімдер туралы айтылды, деп хабарлайды «СуперОмск» порталына сілтеме жасап sputniknews.kz.
«Омбы қаласының тұрғындары 2019 жылы балаларын негізінен Артем (523 бала), Софья (540 қыз) деп атады. Ең жиі қойылған ұл бала есімдерінің қатарына Александр, Максим, Михаил, Роман енді. Ал қыздарға Анна, Дарья, Мария, Полина деген ат жиі қойылған», -деді облыстың мемлекеттік-құқықтық басқарманың қызметкері Наталья Биляченко.
Сондай-ақ, мамандар тұрғындар таңдаған ерекше есімдер туралы да айтты.
«Қос есімдер ішінде Патрик-Павел, Аарон-Николай, Абдул-Карим, Дыль-Мухаммед, Мухаммад-Али, Сиена-Виктория, Мария-Елена, Биби-Омина, Тея-Полина, Елизавета-Аделина, Сафия-Хелин, Еркежан-Кульпаш және Ева-Мария бар. Қыздар мен ұлдарды шетелдік есімдермен де атаған: Сұлтан, Алмаз, Рафаэль, Мишель, Марсель, Леон, Ванесса, Мадлен, Димаш», — деді ол.
