жәбірленуші

Түркістан облысында жантүршіктірерлік жағдай. Келес ауданы, Абай ауылында күйеуі өз әйелін көшеде кетіп бара жатқан жерінде балталап тастаған. Басы мен қолынан жараланған 46 жастағы әйелдің бір көзі енді көрмейді. Енді ғана есін жиған Әлия Әйтімбетованың айтуынша, ол үнемі зәбір көрсетіп келген күйеуінен, екі аптадан бері қыздарымен бірге бөлек тұрып жүріпті. Мүгедек болып қалған Әлияның туыстары күйеу балдары жазадан құтылып кете ме деп қорқады.

Жансақтау бөлімінен палатаға ауыстырылған Әлияның жағдайы осындай (суретте). Қолы шабылған, балта тиген басы қақ айрылғандай. Абай ауылындағы емханада медбике болып істейтін Әлия, екі аптадан бері үнемі ұрып-соғатын күйеуінен кетіп, қыздарымен бөлек үйде тұрып жүрген. Таңертең жұмысқа кетіп бара жатқанда тып-тыныш көшеде ту сыртынан келген күйеуі, екі қызының анасына басқа емес, балта жұмсапты.

«Жұмысқа шығып келе жатқанымда күйеуім Матқұлов Мұрат мені балталап тастады. Тегі сөзге келмейді, өлтіремнен басқаны айтпайды. Сомен 15 жыл отандасып, 16 жылдан бері көретін жәбірлігім сол. Тек зорлық пен зомбылық. Жақындама маған, не болды саған, тыныштық па десем «сөйлеспеймін, сені өлтірем, сені өлтірем» деп балталап тастады мені».

Елуді еңсерген күйеуі әйеліне көшеде шабуылдаған. Қайта әйелдің шыңғырған даусына жүргінші екі жігіт жүгіріп келген соң, Мұрат Матқұлов қаша жөнеліпті. Оқиға орнында көшені бақылайтын камера да орнатылған. Бірақ, ол әлі іске қосылмаған болып шықты. Көп қан жоғалтып, тым ауыр жағдайда түскен Әлияның тірі қалуы үшін дәрігерлер жарты күн ота жасапты. Ол үшін санавияция желісімен облыстан бірнеше дәрігер алдырылған.

Рүстем Раисов, Келес аудандық ауруханасы жарақаттану бөлімінің меңгерушісі:»
Басына оң жағына енді «рубленый рана» дейді ғой балтамен шабылған деген. Сол үлкен жара, шабылған жара. Сосын қолына, оң қолына білек жері кесілген жарақаты, 5-ші саусақ «открытый переломмен». Оның бәрі тігіліп, орнына қойылды сол кезде».

Әлияның көршілері Мұрат туралы жақсы пікірде емес. Қара базарда валюта айырбастап, ақша табатын ол қоңсыларымен де сөйлеспейді екен. Ал, Әлия соңғы уақытта көршілеріне көп шағымданыпты.

Майра Егембердиева, көршісі:»Күйеуім ұрады, мені де ұрады, қыздарды да ұрады, қыздар да безер деп жиі айтып жүрді. Өзі бірақ сәл біртүрлі еді Мұрат».

Қазіргі таңда қолға түскен оның, балтасымен бірге өзінен де сараптама алынған, тергеліп жатыр. Ал, күндіз-түні ауруханада ауыр жарақат алған туысының тілеуін тілеп жүрген жақындары, күдікті жазадан құтылып кете ме деп қорқады.

Жанар Әйтімбетова, жәбірленуішінің жеңгесі:»Ажырасып та көрді бұнымен. Әйтеуір 2 қызы жетім болмасын, осылар әкесі жоқ боп өспесін деп, жалынып келгеннен кейін Құран ұстап бізге ант-суын ішкеннен кейін жарастырып едік. Осы уақытқа дейін жазаланбады ғой бұл. Неше рет ұрды, басқа қылды. Әйтеуір шығып кете береді ғой тыныш қана. Енді осыдан құтылып кетпесін, әділдігін алсыншы бұл».

Әлия Әйтімбетованың туыстары бұл істі прокуратура ерекше қадағалауға алғанын қалайды. Ал, әйелін балталап, қансыраған күйінде тастай қашқан күдіктіге қатысты полицейлер «адам өлтіруге оқталу» бабымен іс қозғады. Бәрінен де, екі қызға қиын соққандай. Өйткені, әбден шошып қалған оқушыларға психологтардың көмегі керек.