Төтенше жағдай режимінің аяқталуына байланысты елімізде әлеуметтік маңызы бар азық-түлік тауарларына қойылған шекті баға алынып тасталды.
Бірақ Шымкентте баға тұрақты. Яғни, әкімдік бекіткен әлеуметтік маңызы бар 11 азық-түлік бағасы бақылауда.
Шымкенттегі базарлардың көкөніс қатарларында сауда қызып тұр. Әсіресе келісі 160 теңгелік картоп пен 120 -150 теңгеден босатылып жатқан пиязға сұраныс жоғары. Ерте піскен ауыл шаруашылығы өнімдеріне баға әр қилы. Оны сатып алушылар да аңғарған.
«Баға сіздер түсіріп жатқан соң арзан ба? Бірақ төтенше жағдайға дейін арзан еді, қазір көтерілген», дейді «Ынтыма»қ шағынауданының тұрғыны Қайрат Ырыскелді.
Базар басшылығы қала әкімдігі белгілеп берген әлеуметтік маңызы бар азық-түлік бағасы үнемі бақылауда дейді. Айтуынша, қостанайлық 1 сұрыптағы ұнның келісі 136 теңгеден. Күріш 270, құмшекердің келісі 186 теңгеден сатылуда.
Әлеуметтік маңызы бар 11 тауарды бекітілген бағамен сату жөнінде Шымкент әлеуметтік-кәсіпкерлік корпорациясымен келісімге тұрған шаһардағы ірі сауда орындары да өз міндеттерін орындауда. Бірінші сұрыптағы ұн белгіленген 147 теңгеден, бөлке наны 75 теңгеден саудалануда. Тізімде макарон өнімдері , күріш, құмшекер мен өсімдік майы да бар.
Азамат Серікбаев, «Шымкент» әлеуметтік-кәсіпкерлік корпорациясындағы тұрақтандыру қорын басқару департаментінің директоры: «Төтенше жағдай режимінің 11 мамырда аяқталуына байланысты министрліктердің бірлескен бұйрығының күші жойылып, әлеуметтік маңызы бар азық-түлік тауарларына қойылған шекті баға алынып тасталды. Алайда , біз өз тарапымыздан әлеуметтік маңызы бар 11 тауардың бағасы шарықтап кетпеуін қадағалап тұрамыз. Мәселен қанттың бір келісін 195 теңгеден асырмау үшін «Фиркан», «Магнум», «Шахан», «Баянсұлу», «Грамад» сауда нүктелерімен меморандум түзілген болатын».
Тұрақтандыру қорымен 1,3 млрд. теңгеге әлеуметтік маңызы бар өнімдер сатып алынған болатын. Бұдан бөлек базарлардың жанында жылжымалы сауда нүктелерінде ауыл шаруашылығы өнімдері белгіленген бағамен сатылуда.
«Бізде картоп 150, ал базарда 180 теңгеден. Бізде арзан пияз 150 теңге, ал сәбіз 120 теңге» , — дейді сатушы Берік Әмзеленов.
Нәпақасын саудадан тауып отырған тұрғын тауарын әкімдік бекіткен шекті бағадан асырмаймыз дейді. Тек өзі емес, қаладағы бүкіл базарларда тізімге енген азық-түлік құнын арттыруға болмайды.
Қайрат Базарқұлов, Шымкент қалалық кәсіпкерлік және индустиралды-инновациялық даму басқармасының өкілі: «Ереже бар. Егерде әлеуметтік маңызы бар тауарларға бекітілген бағадан қымбат сатса, онда ҚР Әкімшілік кодексінің 202 бабы бойынша жауапқа тартылады».
Тұрақтандыру қорының тізіміне енген азық-түліктердің шекті бағасына тоқталсақ:
ӨНІМ ШЕКТІ БАҒА «ГРАМАД» СҮ Базардағы баға (тг)
ұн (1-) сұрып 147 тг 147 тг 136 тг
күріш 361 тг 361 тг 270 тг
макарон
өнімдері 272 тг 208 тг 210 тг
өсімдік майы 427 тг 368 400 -420 тг
қалыпты нан 75 тг 69 75 тг
қарақұмық 299 тг 218 400 тг
құмшекер 194 тг 185 186 тг
картоп 111 тг 105 100-160 тг
пияз 114 тг 114 120-150 тг
сәбіз 120 тг 120 130-150 тг
Айта кетейік, шаһарда азық-түлік тауарларының тапшылығын болдырмау мақсатында 50 тауар өндіруші кәсіпорын, 18 қойма және 25 сауда нысанға зерделеу жұмыстары жүргізілуде. Бүгінде қала аумағында 38,7 мың тонна әлеуметтік азық-түлік тауарларының қоры бар. Жауаптылар қалада азық-түлік тауарлары тапшылығы қауіпі жоқ екендігін алға тартуда.
Шынар Оразова
