Автокөлікке салынатын салық кешірілуі мүмкін. Бірақ жеңілдік барлығына жасалмайды. Рақымшылыққа тек жүрмей тұрған машиналардың иелері ілікпек. Бұл жөнінде ҚР Парламенті Мәжілісінің үкімет сағатында қаржы министрі Ерұлан Жамаубаев айтты.
Пандемияға байланысты 2020 жылға көлік салығын төлеу мерзімі ағымдағы жылдың 1-ші сәуіріне дейін шегерілген болатын. Алайда көлік иелері асығар емес. Мысалы қаламыздағы Еңбекші ауданы бойынша 5 916 азамат көлік салығы бойынша қарызын осы күнге дейін өтемеген. Сомасы 253 млн. теңгеге жеткен.
Министрдің айтуынша, рақымшылыққа, тек жүрмей тұрған машиналардың иелері ілікпек. Мұндай автокөліктерге салық кешірілетін болса, онда есепте бар, алайда іс жүзінде жоқ көліктердің мәселесі шешілетін еді- дейді жергілікті салықшылар.
Естеріңізге сала кетейік, Шымкент қаласы бойынша мемлекеттік кірістер департаменті берген мәлімет бойынша шахарда 289 мың 716 көлік тіркелген. 25 мың 310 көлік иесінің берешегі 1 млрд 108 млн. теңгені құраған. Сала мамандары борышкерлерді жылдың соңына дейін көлік салығы бойынша қарыздарды өтеуге шақырады.
Шынар Оразова