Қаржылық мониторинг агенттігінің хабарлауынша Қызылорда облысында күріш өңдейтін бірнеше компанияда тексеріс басталды. Облыстық департамент әлеуметтік маңызы бар тауарлардың бағасына талдау жүргізіп отырады. Осы орайда жергілікті өнімге басымдық беріледі.
«Мамандар 9 ірі күріш өндірушінің баға белгілеу шараларына талдау жасады. Соның нәтижесінде күріш өңдейтін 6 компанияда тексеріс өткізуге шешім қабылданды. Бағаны көтеру себептері анықталады. Ал қалған кәсіпорындар облыстың тұрақтандыру қоры үшін күріштің бір келісі үшін бағаны 420 теңгеден 350-ге дейін төмендетуге келісті «, — делінген ресми хабарламада.
Тұрақтандыру қорындағы күріш әлеуметтік дүкендерге сатылады. Халық үшін бағасы 350 теңгеден аспауы шарт. Қазіргі кезде «Байқоңыр» әлеуметтік-кәсіпкерлік корпорациясы мен әкімдік күрішті сату мәселесін пысықтауға кірісті.
