2023-2024 оқу жылында елімізде 2,9 миллион баланы қосымша білім берумен қамту жоспарлануда. Бұл жалпы оқушылар санының 81,1 пайызын құрайды. Бұл туралы Оқу-ағарту министрлігінің баспасөз қызметі хабарлады.
Бүгінде елімізде 380 түрлі бағыттағы үйірмелер бойынша қызмет көрсететін 1625 мектептен тыс ұйым жұмыс істейді. 60 мыңға жуық мектеп үйірмесі мен 50 мың спорт секциялары бар.
Қосымша біліммен қамтылған балалардың үлесі 2020 жылы 63,5% болса, 2023 жылы 81,1%-ға дейін өсті.
«Министрлік барлық баланы қосымша біліммен қамтамасыз ету міндетін қойды. Бұл көрсеткішті, оның ішінде шалғай елді мекендерді қоса алғанда 2027 жылға дейін 100 пайызға жеткізу жоспарланып отыр», — деп атап өтті ведомствоның баспасөз хатшысы Мереке Нұрмұханова.
Осылайша, 2023 жылдан 2025 жылға дейін ауыл мектептерінде қоғамдық орталықтар ашу жоспарлануда, бұл қалалық және ауылдық жерлерде қосымша білім беру қызметтерінің сапасындағы алшақтықты азайтады.
Бұдан басқа, қосымша білім беру ұйымдарының саны жылдан жылға артып келеді. Қостанай, Маңғыстау, Павлодар облыстарында және Алматы, Шымкент қалаларында 6 оқушылар сарайының құрылысы жүргізілуде.
