Кентаудағы жылуэлектр орталығында қазандықтарды қайта құру жұмысы жүріп жатыр. Қазір бірінші кезең аяқталуға жақын. 14 мың абоненті бар нысан құрылысы жыл соңына дейін аяқтала ма?
Кентау қаласында орналасқан №5 ЖЭО-ғында 8 қазандық жаңартудан өтіп жатыр. Оның төртеуі ағымдағы жөндеуге жатса, тағы төртеуін реконструкциялау қарастырылған. Ол үшін бюджеттен 2 млрд теңге бөлінді. Қайта құру жұмысын жыл соңына дейін бітіру көзделіп отыр.
Серік Семтиков, №5 ЖЭО директоры: «Қазір дэмонтаж жұмысы жүріп жатыр. 1 аптаға монтаждау жұмысы басталады. Қондырғылардың бәрі жеткізіледі. Облыс әкімінің тапсырмасына сәйкес №8,11 қазандықтар 1 қарашада біту керек. Қалғаны жыл соңына дейін біреміз. Қазіргі таңда №5,6,7,12 қазандықтар 80-85 пайызға дайын».
Қазір құрылыстың бірінші кезеңі аяқталуға жақын. Сондықтан өңір басшысы Кентауға арнайы келіп, нысанның жылу маусымына дайындығын тексерді.
Айта кетейік, №5 ЖЭО-ғы 14 000- нан астам абонентті жылумен қамтамасыз етеді. Оның ішінде 347 көпқабатты үй, 106 бюджеттік мекеме, 401 коммерциялық нысан және 2229 жеке сектордағы үй бар.
