Қазір банк шоттары кәсіпкерлердің салық берешегі 6 АЕК-тен, ал әлеуметтік төлемдері бойынша қарызы 1 теңгеден асқан жағдайда бұғатталады. Мемлекеттік кірістер комитеті кәсіпкерлердің шоттарын болмашы қарызы үшін бұғаттамау үшін заңнамаға енгізілген түзетулерді баяндады.
Cалық кодексінің 19-бабына сәйкес, салық органдары банк шоттарына тыйым салуды 6 АЕК-тен (2023 жылы – 20 700 теңге) астам салық берешегі бойынша жүргізеді. Яғни салық қарызы 6 АЕК-тен аз болса, шот бұғатталмайды. Бірақ әлеуметтік төлемдер бойынша қарыз 1 теңгеден асса, банк шоттары бұғатталады. Өйткені бұл ұйым қызметкерлері бойынша берешек (олардың зейнетақы қорларына, МӘМС қорына түсетін түсімдер) болып саналады.
Сондай-ақ кішігірім қарыз үшін банк шоттарына тыйым салуға жол бермеу үшін шоттар бойынша берешек сомасы шегінде шектеу жүргізу ұсынылады. Яғни, берешек 100 теңге болса, тек 100 теңге бұғатталады.Осы түзетулер қабылданса, банк шотындағы барлық ақша бұғатталмайды, деп атап өтті МКК.
