Шымкентте «International Educational Fair 2023» Халықаралық білім көрмесі жұмысын бастады. Шараның мақсаты — жастардың бəсекеге қабілетті болуы үшін, шетелдік білімнің қолжетімділігі мен таңдау ауқымын көрсете отырып, жан-жақты дамуына, білімді жəне дарынды балаларға өзара тəжірбие алмасуларына қолдау көрсету.7 жыл бойы өткізіліп келе жатқан білім көрмесіне 25 елдің 60 -тан астам ЖОО өкілдері қатысуда.
Шымкентте өтіп жатқан халықаралық білім көрмесіне қатысуға келгендердің қарасы қалың. Солардың қатарындағы 11 сынып оқушысы Ақжүніс Аралбек медицина университетіне түспек. Ол бүгінгі көрмеге өзі таңдаған жоғары оқу орны жайлы мәлімет алуға арнайы келген.
«International Educational Fair 2023» халықаралық білім көрмесі жастар үшін маңыздылығы жоғары шара болып саналады. Соны ескерген ұйымдастырушылар жиынға шаһардағы 264 мемлекеттік және жекеменшік мектептерден оқушылар, 38 колледжден студенттерді арнайы шақырған.
Білімге құштар жастарға мүмкіндік беретін «International Educational Fair 2023» Халықаралық білім көрмесі кеше бас қаламыз Астанада бастау алып, бүгін Шымкент қаласында өтіп жатыр. Ал ертең Алматыда ел назарына ұсынылатын көрменің жабылу салтанаты Өзбекстан Астанасы — Ташкентте өтеді деп жоспарлануда.
