Ағымдағы жылдың қаңтар-қазан айларында Қазақстанның ішкі сауда көлемі 47 триллион теңгеге жетті. Бұл өткен жылдың сәйкес кезеңімен салыстырғанда 20,6%-ға көп. Бұл туралы Finprom сайты хабарлады.
Көлемнің үштен екісінен астамы немесе 32,2 триллион теңге дәстүрлі түрде көтерме саудаға тиесілі. Бұл 2022 жылғы қаңтар-қазанмен салыстырғанда 19,8%-ға көп (физикалық көлем индексі – 111,9%). Бөлшек сауда көлемі 14,8 триллион теңгеге жетті, бұл бір жыл бұрынғыдан 22,6%-ға артық (ФКИ – 106,9%).
Өңірлер бойынша көтерме сауданың жалпы көлемінің үштен екісінен астамы Алматы (12,3 триллион теңге), Астана (5,3 триллион теңге) және Атырау облысына (4,8 триллион теңге) тиесілі. Бөлшек саудада да көлемнің жартысынан сәл астамы үш облыс үлесінде тұр: Алматы (4,8 триллион теңге), Астана (1,9 триллион теңге) және Қарағанды облысы (1,2 триллион теңге).
2023 жылғы қаңтар-қазандағы көтерме сауда құрылымында 82,5%-ды азық-түлік емес тауарлар құрады: 26,6 триллион теңге – 2022 жылғы қаңтар-қазанмен салыстырғанда 24,2%-ға көп (ФКИ – 117,1%). Көтерме саудада азық-түлік тауарлары 5,6 триллион теңгені құрады, бұл бір жыл бұрынғыдан 2,6%-ға ғана көп (ФКИ – 94,3%).
Бөлшек саудада азық-түлік емес тауарлар 67,6%-ды немесе 10 триллион теңгеге жетті. Бір жыл ішінде өсім бірден 29,5% (ФКИ – 114,7%). Азық-түлік тауарлары 4,8 триллион теңгені құрады, бұл бір жыл бұрынғыдан 10,3%-ға көп (ФКИ – 93,8%).
Саудаға салынған инвестиция үшінші жыл қатарынан артып келеді. 2023 жылғы қаңтар-қазанда көтерме және бөлшек саудаға, сондай-ақ автомобильдер мен мотоциклдерді жөндеуге салынған капиталды салымдар көлемі 364,1 миллиард теңгеге жетті. Бұл 2022 жылдың сәйкес кезеңімен салыстырғанда бірден 45,5%-ға көп (ФКИ – 137,6%).
Саладағы жалақы да өскен: 2023 жылдың үшінші тоқсанының қорытындысы бойынша орташа айлық жалақы 317,6 мың теңгені құрады, бір жыл бұрынғыдан 18,8%-ға артық. Бұл ретте сатып алу қабілеті 5,2%-ға өсті, республика бойынша орташа көрсеткіш 3,5%-ға жетті.
