Мегаполис тұрғындарына ерекше көңіл күй сыйлау мақсатында қолға алынған «Шымқала кештері» іс-шарасы жалғасып жатыр. Бұл жолы түрлі шығармашылық ұжым өкілдері өнер көрсетіп, қала тұрғындарына түрлі бағытта қойылымдар ұсынды. Концерт барысында жастар мен балаларға арналған қызықты бағдарламалар да қойылды.
Шымкент циркі бүлдіршіндерге үлкен қуаныш сыйлады. Цирк ұжымы 150-ге жуық балаға тегін қойылым көрсетті. Балақайлар үйретілген жануарлардың өнері мен сайқымазақтың көңілді туындыларын тамашалады.
Ержан Нұрсұлтанұлы, Шымкент циркінің қызметкері: «Бұл жерде қазір 1 сағат көлемінде бағдарлама болады. Бұл бағдарламаның ішінде барлық жанр бар. Он шақты номер болады. Жақсы жанрлар, мықты номерлер келді. Құдай қаласа, халықтың көңілінен шығады деп ойлаймыз»
Мерекелік кешке жиналған балақайлардың қуанышында шек жоқ. Думанды кеште ерекше көңіл күйге бөленген көрермендер қатарында 6 жасар Салиха да бар. Бүлдіршінді ақылды иттің өнері тәнті етіпті.
Салиха Әбдіқаһарова, көрермен: «Цирк маған ұнады. Жақсы болып жатыр»
Іс-шара «Шымқала кештері» концерттер циклының аясында ұйымдастырылды. «Қаратөбе» клубында өткен мерекелік кешке аз қамтылған отбасы балалары шақыртылған.
Бахромжан Бегметов, «Қаратөбе» мәдениет үйінің меңгерушісі: «Бүгін біздің мәдениет үйімізге «Шымкент цирк» келіп отыр. Балаларға тегін қойылым қойып жатыр. Шымкент қаласы әкімдігінің бастамасымен «Шымқала кештері» деген іс- шара аясында, әр аптада осындай шаралар ұйымдастырылып жатыр»
Айта кетсек, «Шымқала кештері» концерттер циклы әр сенбі сайын қаламыздың мәдениет үйлерінде қараша-желтоқсан айларында да тұрақты түрде жалғасады. Шымкенттіктерге мәдени демалыс пен көтеріңкі көңіл-күй сыйлау мақсатында түрлі шаралар ұйымдастыралып отырады дейді жауаптылар.
