Сарыағаш ауданындағы Қапланбек жоғары аграрлық-техникалық колледжі ауыл шаруашылығы үшін ұшқышсыз ұшу аппараттарының операторларын даярлайды. Қапланбек жоғары аграрлық-техникалық колледжінде аграрлық салада сұранысқа ие дрон операторлары оқытылады. Колледж студенттері өздерінің жобаларын Астана қаласында өтіп жатқан «Жұмысшы мамандықтар қаласы» фестивалінде таныстырды.
Ұшқышсыз ұшу аппараттарын қолдану ауыл шаруашылығы дақылдарының өнімділігін арттыруға ықпал етіп, шығындарды азайтуға мүмкіндік береді.
«Бұл – өңірдің экономикалық ерекшеліктерін ескере отырып енгізіліп жатқан заманауи мамандықтар. Агродрондар химиялық препараттарды 20%-ға, суды 80%-ға дейін үнемдеуге мүмкіндік береді, жанармай шығынын, жұмыс күшін және техниканы қолдану көлемін азайтады. Сонымен қатар, олар тұқымдарды, тыңайтқыштарды және өсімдіктерді қорғау құралдарын біркелкі енгізуді қамтамасыз етеді», – деп атап өтті колледж директоры Бағлан Шығанов.
Бұған дейін колледж қытайлық компаниямен меморандумға қол қойып, оның аясында мамандарды даярлау бойынша әдістемелік және материалдық-техникалық қолдау алатын болады, ал оқытушылар өндірісте тәжірибеден өтеді.
Айта кетсек, 2024 жылы Қапланбек жоғары аграрлық-техникалық колледжі 95 жылдық мерейтойын атап өткен болатын. Бүгінгі күнге дейін 30 мыңға жуық сала мамандарын дайындаған оқу орнында бір Кеңес Одағының батыры, 7 Социалистік Еңбек Epi, 14 Мемлекеттік сыйлықтың лауреаты, көптеген ғылым докторлары мен кандидаттары білім алған.
