Бүгін Отырар ауданының әкімі Қайрат Жолдыбайұлы ауыл тұрғындарымен кезекті кездесу жиынын Отырар ауыл округінен бастады. Жиында аудан басшысы алда атқарылатын жұмыстарға тоқталып, басым бағыттарды атап өтті.
Өткен жылы Отырар ауыл округі, М.Шойманов елді мекенінде 150 орындық мәдениет үйінің құрылысы жүргізіліп, ел игілігіне берілді. Сонымен қатар Арыс елді мекеніндегі Парасат, Төлбасиев, Қорқыт көшелерін асфальттау, Қ.Қарабеков көшесін ағымдағы жөндеу жұмыстары атқарылған. Сондай-ақ, Есжанов, Едіге, Бимурзаев көшелеріне тас төселіп, Арыс елді мекенінде балалар ойын алаңшасы ел игілігіне берілген.
2025 жылы да ауыл округінде біршама ауқымды жұмыстар атқарылатын болады. Атап айтқанда ағымдағы жылы М.Шойманов елді мекенінен балалар ойын алаңшасын салу, Арыс елді мекеніндегі Ағыбаев, Жеңіс, Сержанов көшелеріне орта жөндеу, аяқжол салу жұмыстары атқарылады деп күтілуде.
Кездесуде аудан әкімі ауыл тұрғындары тарапынан жол жөндеу, аяқжол салу, электр жарығын реттеу, білім беру салалары бойынша айтылған ұсыныс-пікірлерді мұқият тыңдап, нақты жауаптар берді. Халықтың айтқан әрбір ұсынысын үнемі назарда ұстап, олардың оңтайлы шешілу жолдары қарастырылатынын жеткізді.
Кейбір мәселелерге қатысты аудандық тұрғын үй — коммуналдық шаруашылық, жолаушылар көлігі және автомобиль жолдары бөлімінің басшысы Саттар Нәлібай, аудандық білім бөлімінің басшысы Құдайберген Шербаевтар түсініктеме беріп, заңдылықтарға сәйкес жауаптарын айтты.
Аудан әкімі елді мекенге сапары кезінде жеке қабылдауға жазылған азаматтарды қабылдап, олардың мұң-мұқтаждарын тыңдады.
