Өз денсаулығы үшін әрбір адам кем дегенде бір рет медициналық мекемеге көмекке жүгінетіні белгілі. Емдеу-профилактикалық мекемесі (ЕПМ) – азаматтарға түрлі сипаттағы медициналық қызметтерді көрсететін мекеме.
Қазіргі уақытта көптеген жеке медициналық кабинеттер, медициналық орталықтар, клиникалар ашылуда. Емдеу-профилактикалық мекемелері меншік нысанына қарамастан, «Денсаулық сақтау объектілеріне қойылатын санитариялық-эпидемиологиялық талаптар» санитариялық қағидаларын бекіту туралы Қазақстан Республикасы Денсаулық сақтау министрінің 2020 жылғы 11 тамыздағы № ҚР ДСМ -96/2020 бұйрығының талаптарына жауап беруі тиіс.
Санитариялық-эпидемиологиялық ережеде денсаулық сақтау объектілерін салу және жобалау үшін жер учаскесін таңдауға, сумен жабдықтау және су бұру жүйелеріне, жарықтандыру, желдету, ауа баптау және жылумен жабдықтауға, үй-жайларды жөндеу және күтіп ұстауға, санитариялық-эпидемияға қарсы және санитариялық-профилактикалық іс-шараларды ұйымдастыру және жүргізуге, медициналық қалдықтарды жинауға, залалсыздандыруға, сақтауға, тамақтану жағдайларына, еңбек жағдайлары және қызметкерлерге тұрмыстық қызмет көрсетуге қойылған санитариялық-эпидемиологиялық талаптар атап көрсетілген.
Емдеу-профилактикалық мекемелерге барғанда төмендегі жағдайларға көңіл бөлу маңызды:
— тұрғын үй ғимараттарында қуаты ауысымына 100 келушіден аспайтын халыққа амбулаториялық-емханалық көмек көрсететін денсаулық сақтау объектілерін, оның ішінде жеке кіру есігі болған кезде күндізгі стационарлармен орналастыруға болады;
— тұрғын үй ғимаратында пациенттер тәулік бойы болатын стационарлар орналастырылмайды;
— операциялық, таңу, емшара, манипуляциялық, босандыру, стоматологиялық кабинеттер, науқастарға арналған қабылдау және палаталық бөлімшелер ғимараттардың цокольдық және жертөле қабаттарында орналастырылмайды;
— дәрігерлердің барлық қабылдау кабинеттерінде, палаталарда, қосалқы үй-жайларда суық және ыстық сумен жабдықтап, раковиналарды орнату көзделеді;
— денсаулық сақтау объектілерінің үй-жайларындағы микроклиматтың оңтайлы жағдайлары желдету, ауа баптау және жылыту жүйелерімен қамтамасыз етіледі;
— күрделі жөндеу жүргізу кезінде денсаулық сақтау объектілері үй-жайларының жұмыс істеуі тоқтатылады.
ЕПМ-не санитариялық-эпидемиологиялық бақылау ерекше тәртіппен және жоспардан тыс тексеру жолдарымен жүргізіледі.
Қазақстан Республикасының Кәсіпкерлік Кодексінің негізінде жылына екі рет ерекше тәртіппен тексеру жүргізіледі. Ал, Кодекстің 144 бабының 1 тармағы 2 тармақшасында көрсетілгендей «адам денсаулығына жаппай қатер төндіретін нақты фактілер болған жағдайда, жоспардан тыс тексеру жүргізіледі».
Осы ретте, Қазақстан Республикасы Денсаулық сақтау министрінің 2017 жылғы 27 маусымдағы №463 және Қазақстан Республикасы Ұлттық экономика министрінің 2017 жылғы 20 шілдедегі №285 бірлескен бұйрығына сәйкес тексеру барысында:
— ғимараттар мен бөлмелердің сәулеттік-жоспарлау шешімдері нормативтерінің сақталуына;
— бөлмелер мен инженерлік жабдықтардың санитарлық-техникалық жағдайына;
— бөлмелердің жарықтандырылуы мен ықшам климат нормативтерінің сақталуына;
— ғимараттар мен оның аумағының ішкі, сыртқы жайластырылуының жалпы жағдайына;
— бөлмелердің жалпы санитарлық-гигиеналық тәртібінің сақталуына (жинау, ауа алмасуы және т.б.);
— шудан қорғауға арналған шаралардың орындалуына;
— төсек жапқыштармен, инвентарьмен, жиһаздармен, жуғыш заттармен және т.б. қамтамасыз етілу жағдайларына;
— аурухананың кір жуатын орындарының, дәріхана, шаруашылық және басқа да көмекші қызметтерінің жұмыс тәртібіне;
— ағынды суларды тазарту жағдайларына;
— қалдықтар мен қоқыстарды жинауды, сақтауды, шығаруды және пайдаға асыруды ұйымдастыру мен олардың орындалу тәртібіне;
— атмосфералық ауаның ластануын алдын-ала ескерту бойынша шаралардың орындалуына бақылау жүргізіледі.
Ж.Н.Сарсекулова,
Шымкент қаласы Тұран ауданы
СЭББ бас маманы
