Ел президентінің тапсырмасымен есірткінің заңсыз айналымын ұйымдастырушылар мен есірткі таратушыларға, оның ішінде «есірткі курьерлеріне» (закладчик) қатысты қылмыстық жауапкершілік сараланғаны белгілі. Енді алғашқы рет заңды бұзған есірткі таратушылар ҚР ҚК-нің 297-бабы бойынша төмендетілген санкциялармен жауапкершілікке тартылатын болады.
Нақтырақ айтсақ, 2025 жылдың 3 наурызынан бастап осы баптың 1-бөлігі бойынша 5 жылдан 8 жылға дейін, 2-бөлігі бойынша 6 жылдан 10 жылға дейін, 3-бөлігі бойынша 7 жылдан 12 жылға дейін бас бостандығынан айыру жазасы көзделеді. Яғни, жаза жылдары біршама шегерілді.Ал тиісінше есірткінің заңсыз айналымын ұйымдастырушылар мен есірткі өндірушілерге, лауазымды тұлғаларға жазаны қатайтатын ҚК-тің 297-1 бабы енгізілді. Ендігі уақытта олар 15 жылдан 20 жылға дейін немесе өмір бойына бас бостандығынан айырылады.
Енгізілген өзгерістер қылмыстық жауапкершіліктің әділ жүйесін қалыптастырады. Сондай-ақ қоғамды есірткінің заңсыз айналымының зардаптарынан қорғау шараларын күшейтеді деп сенеміз.
