Шымкент қаласындағы президент резиденциясы қалалық білім басқармасының балансына өтті. Басқарма қазір оны лагерге айналдыру ісіне кірісіп кеткен. Бұл лагерьге кімдер жіберіледі? Олар немен айналысады?
Шымкент қаласының әкімі Ғабит Сыздықбеков тамыз конференциясында қаладағы Президент резиденциясы жаңа оқу жылынан бастап дарынды балаларға арналған легерь ретінде жұмыс істейтінін мәлімдеді. Әкім сөзінше, онда олимпиада жеңімпаздары, үздік оқушылар, өнертақыштар мен ғылымға құштар және мәдениет пен өнерде ерекше жетістіктері бар балалардың бас қосуына мүмкіндік туады. Әр ауысымда 50-60 баланы қабылдайтын мекеме 2500-ге жуық баланы арнайы бағдарламамен тәрбиелейді. Бұған кім мұрындық болды?
Сәрсен Құранбек, Шымкент қаласы әкімінің орынбасары: «Президент резиденциясы иә, бізде бар. Дендрапарктің бір бұрышында орналасқан. Бұл резиденция болып келе жатқанына біраз жыл болды ғой. Бірақ өздеріңіз білесіздер Қасым-Жомарт Тоқаев мұндай резиденцияларды бірінші кезекте балалардың игілігі үшін пайдалану туралы айтып келеді. Және оны айтып қана қоймай бұл ұстанымды жүзеге асырып келе жатыр. Осының келесі бір жарқын көрінісі секілді осы қаладағы өзінің резиденциясын дарынды балаларға арналған лагерге айналдыру туралы пәрмен берді. Сәйкесінше құжаттар рәсімделді.
Сәрсен Құранбектің айтуынша, әкімдік қазір лагердің жұмысын жоспарлап, шығынын есептеп жатыр. Десе де резиденция қалай балалар лагеріне айналды? Лагер қашан іске қосылады?
Сәрсен Құранбек, Шымкент қаласы әкімінің орынбасары: «Бұл бұрын мемлекеттік мекемеден екінші мекемеге өту процесі бар. Мұның бәрін қаржы басқармасы жүзеге асырады. Құжаттары дайын болған күнде, ары кетсе бір аптаның ішінде жүзеге асатын жұмыс. Сондықтан ол қағаздар аяқталып қолды ау деймін бүгінгі таңда. Бүгінгі таңда білім басқармасының балансында. Білім басқармасы осыған қажетті шығындарды есептеп, алдағы болатын мәслихат сессиясына осы шығындардың көлемін бекітуге шығарғалы отыр. Жұмыс қарқынды жүру үстінде».
Қалалық білім басқармасы президент резиденциясы басқарма балансына өткенін растады. Енді оны лагерге айналдыру жайы ойластырылып жатыр.
Бағлан Үмбетбаев, Шымкент қалалық білім басқармасының бөлім басшысы: «Бұл біздің Шымкент қаласында алғаш рет ашылғалы отырған лагерь деп айтсақ болады. Себебі білім басқармасында қазіргі таңда бір ғана лагерь бар. Ол Ақсу лагері. Қалада балалардың бос уақытын тиімді ұйымдастыру мақсатында әлеуметтік осал топтың балалары қамтамасыз етіліп келген. Ал дарынды балалармен лагермен қамту біздегі республикалық Балдәурен лагеріне арнайы нысан бойынша жіберілетін болса, қалада мұндай лагер ашылмаған, алғашқы рет ашылғалы отыр».
Басқарма мәліметінше, қалада 271 мыңнан аса оқушы бар. Жылына 300-ден аса дарынды бала республикалық лагерлерге жіберіледі.
Дилара Иса
