Шымкентте су және кәріз жүйесінің 73,5 пайызы тозған. Жүктемені азайту және жүйенің сенімділігін арттыру мақсатында 164,4 шақырым желіні жаңғырту жоспарланған. Бұл көрсеткішті 16%-ға дейін төмендетуге мүмкіндік береді. Жоба аясындағы жалпы инвестиция көлемі 2026 жылы 44,9 млрд. теңгені құрайды. Бұл туралы ҚР Ұлттық экономика министрлігінің Табиғи монополияларды реттеу комитетінің өкілі Арман Мәліктің төрағалығымен өткен жиында мәлім болды.
Оңтүстік өңірінде «Энергетика және коммуналдық секторларды жаңғырту» ұлттық жобасы іске қосылды. Жобаның негізгі мақсаты су, жарық және жылу жүйелерінің тозу деңгейін төмендетіп, жүйелердің сенімділігін арттыру және инфрақұрылымға қосымша инвестициялар тарту болмақ. Осыған орай, Шымкент қаласында су, газ, жарықпен қамтамасыз ететін мекемелердің, құрылыс және жобалау ұйымдарының, отандық өндірушілердің қатысуымен жиын өтті. Іс-шара барысында ұлттық жобаның мақсаттары, жұмыс жоспары мен алдағы кезеңдер таныстырылды.
Арман Мәлік, ҚР Премьер министр орынбасарының кеңесшісі: «Қазіргі таңда бізде платформа жасалып жатыр. Осы ұлттық жобаның өзінің жеке платформасы. Ол ашық болады. Сол платформадан монополист өзінің өтінішін беретін болады. Әр этапты өткендігі жайлы ақпарат беріліп отырады. Қай жерде қандай жұмыс істейін деп жатыр.Техникалық оператордан қалай өтті. Мынау қаржылар оператордан қалай өтті. Жаңағы қандай кредиттер алды. Жергілікті табиғи монополиялар департаменттері қандай тарифтерді, қандай келісімдер алды. Сол ақпараттың бәрі платформада көрсетіліп отырады. Ашықтықты қамтамасыз етіп отырмыз».
Жиында 2026 жылға дейінгі жұмыс жоспары кезең-кезеңімен таныстырылып, индустрия, құрылыс және қаржы салаларының мамандары өз бағыттары бойынша баяндама жасады.
Рзабек Меңдіқұлов, Шымкент қаласы Энергетика және инфрақұрылымды дамыту басқармасының басшысы: «Электр жағынан қазіргі таңда тозу көрсеткіші 57 пайыз. Жобаны іске асырғаннан кейін 10 пайызға тозу көрсеткіші түседі. Жылу жағынан 37-ден 30-пайызға түседі, су кәріз бойынша 75-тен 64-пайызға түседі».
Жоба ашықтығы үшін арнайы платформа құрылуда. Оның көмегімен әрбір өтінім, техникалық және қаржылық операторлардан өту барысы, тариф пен келісім шарттары туралы ақпарат қолжетімді болады. Сонымен қатар, жауапты өкілдердің айтуынша, жоба аясында тарифтердің күрт өспеуін қамтамасыз ету үшін мемлекет тарапынан субсидия қарастырылмақ.
Ботакөз Әнуар
