Жаңа оқу жылында Шымкент қаласында ауқымды әрі маңызды іс-шара – «Прокурорлық сағат» өткізілді. Қаланың барлық білім беру ұйымдарын қамтыған бұл жобаға 90 мыңнан астам оқушы қатысты. Іс-шараның басты мақсаты – жастардың құқықтық сауаттылығын арттыру, құқық бұзушылықтың алдын алу және құқық қорғау органдарының қызметімен таныстыру болды.
Іс-шара ашық диалог форматында ұйымдастырылды. Прокуратура органдарының өкілдері мен ардагерлері оқушылармен еркін әңгімелесіп, өздерінің кәсіби жолындағы тәжірибелерімен, өмірлік сабақтарымен бөлісті. Бұл формат жасөспірімдерге құқық қорғау саласының нақты қызметімен жақынырақ танысуға, көкейде жүрген сұрақтарына жауап алуға мүмкіндік берді.
Құқық қорғау жүйесінде ондаған жыл еңбек еткен ардагерлердің шынайы оқиғалары мен өмірлік мысалдары жастарға үлкен әсер қалдырды. Олар заңға бағынудың маңыздылығы, жауапкершілік пен адал еңбектің құндылығы жөнінде терең ой қозғады.
Кездесу барысында оқушыларға арнайы әзірленген «IDos» атты ресми TikTok аккаунты таныстырылды. Бұл – құқықтық мәдениетті жастарға жақын әрі қолжетімді форматта түсіндіруге арналған инновациялық цифрлық платформа.
«IDos» TikTok парақшасында: Жасөспірімдер арасында жиі кездесетін құқық бұзушылық түрлері; Қоғамдық тәртіп нормалары; Заңға қайшы әрекеттердің салдары; Дұрыс мінез-құлық пен азаматтық жауапкершілік сияқты тақырыптар бойынша қысқа, мазмұнды бейнероликтер тұрақты түрде жарияланып отырады.
Бұл – профилактикалық жұмыстың жаңа форматы. Себебі TikTok секілді платформалар – қазіргі жастардың негізгі ақпараттық алаңдарының бірі. Сол себепті заң нормаларын заманауи, түсінікті тілде жеткізу – олардың санасына тез әрі тиімді әсер етуге мүмкіндік береді.
«Прокурорлық сағат» аясында көтерілген негізгі мәселелердің бірі – жастар арасында құқықтық мәдениетті қалыптастыру қажеттілігі. Бүгінде жасөспірімдер арасында орын алатын құқық бұзушылықтар, оның ішінде кибербуллинг, ұрлық, төбелес пен вандализм сияқты фактілер қоғамда алаңдаушылық туғызып отыр.
Осыны ескере отырып, құқық қорғау органдары құқықтық тәрбиені мектеп қабырғасынан бастау керектігін, ал ашық диалог пен сенімге негізделген түсіндіру жұмыстары тиімді нәтиже беретінін атап өтті.
Бұл іс-шара – құқық қорғау органдарының жастармен тығыз байланыс орнатып, олардың бойында заңға құрметпен қарау, қоғам алдындағы жауапкершілік, азаматтық сана қалыптастыру бағытындағы нақты қадамы. Прокуратура органдары тек жазалау шараларымен емес, алдын алу мен тәрбиелік жұмыстар арқылы құқықбұзушылықпен күресудің жаңа, тиімді тәсілдерін енгізіп келеді.
«Прокурорлық сағат» – тек ақпараттық кездесу емес, ол – жастардың құқықтық ой-санасын қалыптастыруға арналған маңызды алаң. Шымкент қаласындағы 90 мыңнан астам оқушыны қамтыған бұл бастама – құқықтық мемлекет құру жолындағы жүйелі жұмыстың нақты көрінісі.Мұндай форматтағы іс-шаралар алдағы уақытта да жалғасын тауып, оқушылармен тікелей әрі ашық жұмыс жүргізу арқылы болашақ саналы азаматтарды тәрбиелеуге өз үлесін қоса бермек.
