«Отбасы күніне» арналған іс-шаралар қалалық жасөспірімдер орталығында да жалғасын тапты. Ұйымдастырушылар – Шымкент қалалық әкімдігі, «Нұр Отан» Халықтық демократиялық партиясының қалалық филиалы және отбасылық тәрбиелеу орталығы.
Отбасылық спорттық сайыс, мәнерлеп оқу, сурет салу сайыстарын қамтыған байқауға қаладағы көптеген отбасылар қатысты. Сондай-ақ, мектеп оқушыларының салған суреттерімен «Гүлді кілем» атты көрме жұмыстары да ұйымдастырылды. Отбасылық ансамбльдер ән шырқап, дарынды жастар өнерлерін көпшілікке паш етті. Сурет сайысында балалар тату-тәтті отбасы мүшелерінің суреттерін бейнелесе, спорттық сайыста отбасы мүшелері бірнеше тур бойынша бақ сынасты. Мұндағы мақсат – жеңіс емес, бастысы отбасылық ауызбіршілік пен ынтымақты қалыптастыру. Мұны қатысушылар да ұйымдастырушылар да жақсы біледі.
– Әрбір отбасы — мемлекетіміздің іргетасы. Біз де отбасымызбен бүгінгі байқауға атсалысып отырмыз. Мақсатымыз –осындай тәрбиелік мәні терең сайыстарға қатыса отырып, өсіп келе жатқан ұл-қыздарымызға жақсы тәлім-тәрбие беру, – дейді Нұрақовтар отбасы.
Гүлнұр СӘТБАЕВА
