Шымкентте білім министрлігінің қолдауымен Республикалық турнир өтті. Жарыс бес күнге жалғасты. Еліміздің бір қатар облыстарынан 7 команда жиналды. Сондай-ақ, оңтүстіктен де 3 команда бас жүлдеден үмітті болды. Чемпионат талабына сай командалар екі топқа бөлінді. Турнир барысында ептілік танытқан екі команда топты жарып, ақтық сында кездесті.
«Локомотив» стадионының жасыл алаңында №7 футбол командасымен талдықорғандық қонақтар кездесті. Ойын тізгінін шымкенттіктер қолға алғанымен ойынның бірінші таймында есеп ашылмады. Тек матчтың екінші жартысында ғана л №7 футбол мектебінің футболшылары қақпаға гол соқты. Нәтижесінде талдықорғандық қонақтар есепті теңестіре алмай, жеңісті алаң қожайындарына сыйлады. Жерлестеріміз биылғы маусымның өзінде осымен екінші рет чемпион атанып отыр.
Республикалық жарыста ептілігін сынға салуға 10 команда ниет білдірген. Олардың үшеуі шымкенттік команда болатын. Нәтижесінде үшінші орынды Бекзат Саттарханов атындағы дарынды балаларға арналған спорт интернатының шәкірттері жеңіп алса, талдықорғандықтар күмістен алқаны тақты. Ал бас кубокты №7 футбол мектебінің аяқдопшылары еншіледі.
