«Қазақтың жүз әні». Ел аумағындағы Назарбаев зияткерлік мектептерінде халық әндерін балаларға насихаттау жобасы бастау алды. Шараның мақсаты — шәкірттер арасында халық және тәрбиелік мәні зор фольклорлық әндерді насихаттау. Осындай шара физика-математика бағытындағы Назарбаев зияткерлік мектебінде өтті.
Жобаны ұстаздардың өздері бастап берді. Білім ұясының директорына дейін ұлттық киім киіп, оқушылардың алдында «Дедімай-ау» әнін шырқап берді. Ондағысы — алдымен балаға үлгі болу. Қала берді, ертең шәкірттен сұрағанда да өзі халық әнін біліп тұрған ұстаздың мерейі үстем болары анық.
Айта кетейік, бүгінде Қазақстанда 16 Назарбаев зияткерлік мектебі бар. Онда нақты ғылымдар бойынша балаларға тереңдетіп дәріс оқылады. Ал «Қазақтың жүз әні » секілді жоба бұл білім ұяларында тек ғылымға берілген баланы ғана емес, өз ұлтының салт-дәстүрі мен рухани құндылықтарына қанып өскен тұлғаны тәрбиелеуге көмек береді.
