Полина әжей үшін көгілдір отынға ас дайындау — арман. Күнделікті асын көк ошаққа от жағып дайындайды. Қара суға дән салып, ол ботқа болғанша қайнатады. Үйінде ауызсу да жоқ. Суды сұрап ішеді.
Өз перзенттерінен қайыр болмаған соң 77 жастағы қария тұрмыстың бар тауқыметін өз мойнына алған. Анда-санда көрші балалар көмектесіп тұрады, соны жанына медет етеді.
Забадам елдімекенінің тұрғыны Полина Евсефееваның қандай жағдайда күн көріп жатқанымен көпшілік әлеуметтік желіден таныс. Ғаламтордағы суреттерге бей-жай қарай алмаған жерлестеріміз қолынан келгенше көмек көрсетуге тырысты. Бірі нанын алып келсе, өзгелері үйін қоқыстан тазартып беріп жатыр.
Ринат Гафуров, қала тұрғыны: «Біз ғаламтор арқылы бұл қарияға көмек жинадық. Бей-жай қалмағандар көп болды. Күнделікті осындамыз. Үйін де жинап бердік. Бірақ, қыстың күні бұл қарияның жағдайы қала болатыны барлығымызды қынжылтып отыр. туыстары неге қол ұшын бермейді деп аң таң болдық.»
Кезінде медбике болып жұмыс істеген Полина Евсефеева екі құрсақ көтерген. Ұл-қызының туылған күні, сағаты, тіпті, салмағына дейін есінде. 60-жылдардан бері жолдасы екеуі бірлесе кірпішін қалаған бұл үй қаңырап бос тұр. Немерелері бар. Бірақ, Полина әжей қирап жатқан төрт қабырғаның ішінде жалғыз қалған.
Полина Евсефеева : » Өміріме өкінішпен қарамаймын. Әрине, оңай емес. Үйімді әрлеп, сырлауға күшім жетпейді. Білектен күш кеткен соң қиын екен ғой. Балаларым мен немерелерімді де кінә таға алмаймын. Өйткені, олардың да өз өмірі бар.»
Тілшілер кете салысымен Полина әжейдің күтушісі пайда болды. Ол — өзінің туған келіні. Кейуананың барлық құжаттары мен зейнетақысы да осы кісінің қолында болып шықты. Келінінің сөзіне сенсек, алжыған ананы үйіне алып кете алмайды, қашып кете беретін көрінеді.
Елена Смирнова, келіні: «Ол жалғыз емес — қос немересі бар. Біз оған жиі келіп тұрамыз. Құжаттарын мен түгелдеп, ол 30 мың теңге зейнетақы да алады. Бұл ақшаға оған азық-түлік алып келеміз. Барлығымен де қамтамасыз етеміз. Үйге алып кетсек, қашып кетеді.»
Ертеңіне әжейдің бақилық болғанын естідік. Қарияның көршілері редакцияға қайғылы хабарды жеткізді.
