Қазан айының 9-жұлдызы — пошта байланысы қызметкерлерінің күні. Осыған орай «Қазпошта» АҚ-ның облыстық филиалы «Жазылушылар күні» акциясын өткізді.
Тәңсәріден бастап орталық «Қазпошта» ғимаратының алдына жиналғандардың қарасы көп болды. Олар күнгейде шығарылатын басылымдармен танысып, сүйікті газет-журналдарын тегін алды. Келушілердің арасында «Оңтүстік Рабат», «Рабат» газеттерінің оқырмандары да болды. Айтулы күні көрсетіліп отырған мүмкіндікті пайдаланғандар келер жылға жазылды.
Сондай-ақ мерекелік шара барысында зейнет жасындағы пошта қызметкерлеріне құрмет көрсетіліп, үздіктер марапатталды. Облыс аумағында қызмет көрсетіп жүрген 30 пошташыға велосипед табысталды. Кәсіби мереке күні күтпеген сыйлық алған пошташылар қуанып қалды.
[youtube]https://www.youtube.com/watch?v=B3eMiIYfdTM[/youtube]
Айта кетейік, жыл басынан бері осындай велосипедтер 64 пошташыға берілді. Оларды пошта байланысы арқылы оқырмандарын табатын жергілікті басылымдардың ұжымдары мен демеушілер алып беріпті. Ауа райының кез келген уақытында хат-хабар тарататын, күн ұзаққа аяғын тоздырып жүретін пошташыларға бұл үлкен қолдау болып отыр.
